Jemqorlyqqa qarsy kúres pármendi bolýy kerek

Nur Otan partııasy ataýyn ózgertpeı turǵanda da sybaılas jemqorlyqqa qarsy jumystarǵa atsalysqan. Buǵan ondaǵy Sybaılas jemqorlyqqa qarsy keńestiń jumys isteıtini aıqyn dálel bola alady. Bastaýysh organdarda, fılıaldarda keńes, komıtet boldy. Endi sol ýaqyttaǵy atqarylǵan jumystardy jańǵyrtyp, jańa bir aǵysyn kórsete bilsek, nátıje ózdiginen kórinedi.

Negizi munyń baǵyty bar, joǵaryda atap ketken partııadaǵy Sybaılas jem­qorlyqqa qarsy keńes pen fılıaldardaǵy baqylaý komıtetteri jumys istep tur. Sol keńes pen komıtettiń ókilderi eń aldy­­men partııanyń atynan arnaıy or­gan­darǵa qaraýǵa jiberilgen jemqorlyqqa qarsy isterdi jeke-jeke baqylaýǵa alýy qajet. Sonymen qatar taǵy bir mańyzdy jumys, osyndaı tekserýge ilikken isterdi boldyrmaýdyń joldaryn, ıaǵnı aldyn alý sharalaryn iske qosqany jón. Bul jumystar resmı kezdesýler men sse­narıı aldyn ala jazylyp qoıǵan for­mal­dy is-sharalar arqyly emes, jandy tal­qylaýlar men betpe-bet dıalogter arqyly iske asyrylǵany abzal. Mysa­ly, depýtattar jergilikti jerlerge issaparmen jıi shyǵady, sol jumys saıa­hat sııaqty ótýmen, esep toltyrýmen aıaqtalmaýy kerek. Árbir obektini aralaý kezinde naqty máseleler qaralyp, talqyǵa salynyp, túıtkilderdiń túıinin tarqatýdyń joldary arnaıy anyqtamada toltyrylýǵa tıis.

Jalpy, sheteldik partııalarda «jeke is» degen uǵym bar. Jemqorlyqqa qatys­ty jeke adamdardyń isi eń aldymen par­tııanyń bıýrosynda nemese bastaýysh uıymdarynda qaralýy qajet. Qazir kóbi­ne jekelegen adamdar partııaǵa ondaǵy qyzmetin paıdalaný úshin múshe bolady. Qyzmetin paıdalaný sybaılastyq­qa soqtyrýy múmkin. Partııanyń ereje­lerin buzǵan, sybaılas jemqorlyqqa qandaı da bir qatysy bar múshelerge qatań she­shim­der qabyldanýy kerek. Qajet bolsa, par­tııadan shyǵarý, shettetýge deıin barýǵa bolady. Sonda ǵana onyń múshe­leri jemqorlyqtan taza bolýǵa umty­lady. Irgeli  partııada osyndaı rýh bolýy qajet. Sondyqtan ózgeristerge bet alǵan partııaǵa múshelikke qabyldaýdyń ereje­sine de ózgerister engizgen jón. Múshe­likke ótinish bergende úmitkerdiń partııaǵa kirýdegi maqsaty, partııany damytýdaǵy keshendi josparlary qosa tapsyrylýy kerek. О́ıtkeni partııaǵa san jaǵynan emes, sapalyq quramdy ózgertetin kez keldi.

Dáýletkereı RAHMETÝLLIN,

«Jańarý» sybaılas jemqorlyqqa qarsy jalpyulttyq qozǵalysynyń basshysy