Bul úrdis memlekettik tapsyrys jaǵdaıynda júzege asady. A.Satybaldınniń aıtýynsha, áleýmettik nysandar salý turaqty ári bolashaǵy bar bıznes jobaǵa aınalmaq. Al kásipkerge ótemaqy jataqhana qurylysy nemese jóndeý jumystary tolyǵymen aıaqtalǵannan keıin tólenetin bolady. Memlekettik tapsyrystyń basty talaby jan basyna qarjylanatyndyǵynda. Al stýdent osy salynǵan jataqhanada mindetti túrde turýy qajet. Qurylys jumystaryna memlekettik emes uıymdar qatysa alady. Memlekettik tapsyrystyń jyldyq mólsheri qurylys salynǵan jaǵdaıda bir stýdentke 122 AEK (Almatyda – 144 AEK), qaıta jóndeý kezinde – 47 AEK (Nur-Sultan jáne Almatyda 92 AEK) qarastyrylǵan. Bul jobaǵa respýblıkalyq bıýdjetten 152 mlrd teńge bólinedi.
A.Satybaldın stýdentterdiń aı saıynǵy tólemderi memlekettik tapsyrys qunyna kirmeıtindigin atap ótti. Onyń mólsherin jataqhana ıesi retteıdi jáne belgili bir aımaqtyń turǵyn úı naryǵynyń jaǵdaıymen anyqtalady. Sondaı-aq kásipker turmystyq qyzmet kórsetý úshin ashana, shashtaraz, trenajer zaly sııaqty kommersııalyq qyzmet alańdaryn da jasaqtaý quqyǵyna ıe. Búginde 30 630 oryndy 124 jataqhana paıdalanýǵa berilgen.
A.Satybaldın sonymen qatar jekemenshik mektepterdi salýdyń tıimdiligine toqtaldy. Spıker atap ótkendeı, elimizdegi oqýshylar sany jyl saıyn artyp keledi, al memlekettik mektepterdiń júktemesin azaıtý ýaqyt kúttirmeıtin másele. Aıta ketsek, Qazaqstanda 2019-2021 jyldary 94 696 oryndy 287 jekemenshik mektep ashylsa, onyń 41-i Almatyda ornalasqan.
Al 2018 jyldan bastap jekemenshik bilim berý uıymdarynda orta bilim berýge memlekettik bilim berý tapsyrysyn ornalastyrý múmkindigi zańdy túrde bekitilgen. Jańadan iske qosylatyn jekemenshik mektepter úshin aǵymdaǵy jylǵa normatıv orta eseppen 532 myń teńgeni, jylyna jańadan engizilgen árbir oqýshy orny úshin ǵımarattyń amortızasııasyna arnalǵan shyǵystar: qurylys kezinde – 96 AEK (294 myń teńge), rekonstrýksııa kezinde – 47 AEK (143 myń teńge) quraıdy. Qarjy ortalyǵynyń ókili qazirgi ýaqytta «Damý» kásipkerlikti damytý qory arqyly jataqhanalardy da, jekemenshik mektepterdi salý jáne rekonstrýksııalaý boıynsha banktik qaryzdardy sýbsıdııalaý tetigi jumys istep turǵanyn habarlady. Salynǵan qurylystar memleketten tóleý merzimi ótkennen keıin qurylys salýshynyń menshiginde qalady.
ALMATY
