Bul kúnde aýyldyqtar Taraz qalasynan tógiletin shaıyndy sýlardyń tógiletin orny men qoqys alańyna alańdaýly. Talaı jyldan beri qalanyń qajetsiz sýy osy aýyl mańyna tógiledi. Atalǵan másele ákimderdiń esepti kezdesýlerinde jıi kóterilgenimen, sheshimin tappaı keledi. Shaıyndy sý men qoqystyń qolqany qapqan kúlimsi ıisi, ásirese kún jylynǵanda turǵyndarǵa maza bermeıdi. Endi sanaýly kúnderden keıin kún jylynatynyn eskersek, bul máseleniń ózektiligi taǵy da arta túsedi. Aýdan basshylary sheshe almaǵan máseleni kópshilik qaıta kóterip, endi oblys ákiminen kómek surap otyr. Sonymen qatar aýyldyqtar kóshe máselesin de kóterýde.
«Aýyl kóshelerine asfalt jabyny tóselse degen tilek bar. Es bilgeli aýylda 95 úı bar edi. Sol kóbeımeı-aq qoıdy. Jastar úı salatyn jer bolmaǵan soń qalaǵa kóship ketýde. Nege ákimdik aýyl irgesinen turǵyn úı salatyn jer bólmeıdi?» deıdi aýyl turǵyny Murat Jumabaev.
Munda jaǵdaı bolmaǵan soń bul kúnde aýyl jastary qalaǵa jıi kóshetin bolǵan. Osy máselege alańdaǵan turǵyndar endi aýdan basshylyǵy jas otbasylar úı salatyn jer qarastyrsa deıdi. Búgingi tańda aýyldyqtar úshin eń kúrdeli məsele jer bolyp otyr. Oblys ákimi aýdan ákimine jylda mal basyn kóbeıtý týraly tapsyrma bergenimen, qazirgi kezde aýyl mańynda jaıylymdyq jer joq. Malǵa qajetti jer tabý qıyn. Al paıdalanylmaı jatqan egistik jerler men basqa da alqaptardy memleketke keri qaıtaryp alý jumystary baıaý júrýde. Jerdi jekeshelendirip alǵan kásipkerlerdiń kóbi jerdi ne ózine, ne ózgege joq qylyp otyr. Sondaı-aq Bektemir Madenbaev, Baqyt Jabynov jáne ózge de aýyl turǵyndary jańa salynǵan úılerdi gazǵa qosý jáne aýyldan sport keshenin salý týraly da aıtty. Aýyldyń búgingi ahýalyna alańdaǵan kópshilik atalǵan máseleler aldaǵy ýaqytta oń sheshimin tabady degen úmitte.
Qazirgi kezde kúrdeli másele bolyp otyrǵan jaıylym məselesi óńirdegi barlyq aýylda bar. Al kúni keshe ǵana taǵaıyndalǵan aýdan ákimi Erlan Qydyralyulynan halyqtyń kútetini kóp. Alaıda jańa ákim osy ýaqytqa deıin sol aýdanda ákimniń orynbasary bolyp talaı jyl jumys istese de, aýylsharýashylyq salasyna basshylyq jasasa da bul máseleni sheshpegen. Degenmen aýyldyqtardyń áli de úmiti zor. Biraq talaı jyldan beri túıtkildi másele bolyp kelgen shaıyndy sýlardyń máselesin sheshý úshin bıologııalyq tazartý ortalyǵyn salýǵa aýdan túgili, oblystyń kúshi jetpeı otyr. Sondyqtan da Jambyl oblysynyń ákimdigi atalǵan máseleni sheshýge respýblıkadan kómek suraýda.
Al Kólqaınar aýyldyq okrýginiń ákimi Asylbek Qonarovtyń aıtýynsha, okrýgte aýyl sharýashylyǵy maqsatyndaǵy 5 167 gektar egistik, 1 749 gektar jaıylym jáne 552 gektar shabyndyq jer bar. О́tken jyly 2 073 gektar alqapqa egin egilip, odan 17 507 tonna ónim jınalǵan. Jaqsy ónim jınaý úshin 62 sharýa qojalyǵyna «Qapal» jáne «Talas-Asa» kanaldary arqyly 6 mln 976 myń tekshe metr sý berilgen. Osy jyldyń ónimi úshin 100 gektarǵa kúzdik bıdaı sebilip, kóktemgi egiske daıyndyq barysynda 1 200 gektar alqapqa súdiger kóterilipti. Sondaı-aq aýyldyq okrýgte mal basy jyl ótken saıyn artýda. Esepti kezeńde múıizdi iri qaranyń ózi 400, qoı-eshki 900 jáne jylqy 76 basqa ósken. Kólqaınar aýyldyq okrýgine qarasty 5 eldi mekenniń turǵyndary da negizinen mal asyrap kúneltedi. Biraq tórt túliktiń babyn tabý úshin taǵy da jaıylym máselesi aldan shyǵady. Al bul máseleni jýyq arada sheshý ońaı bolmaı tur.
«Elimizdiń Aýyl sharýashylyǵy mınıstrligi normalaryna sáıkes qajettilikti esepteý kezinde aýyldyq okrýg boıynsha jaıylymdyq jer tapshylyǵy 14 002 gektardy qurady. Onyń ishinde Eńbek aýylynda 1 986 gektar jaıylym jetispeıdi. Aýdannyń jer qorynan eldi mekenderden 5-7 shaqyrymdyq radıýsta jaıylymdyq jerlerdi konkýrs arqyly berýge tyıym salyndy. Karta boıynsha eldi mekenderden 5 shaqyrym aımaqta 1 002 gektar jaıylymy bar 17 sharýa qojalyǵy anyqtalǵan. Olardyń barlyǵyna da eskertý habarlama berilgen. Okrýg aýmaǵynda «Asa Damý» jáne «El-Daýlet» jaýapkershiligi shekteýli seriktestigi, «Qyzyl-Dıhan qojalyǵy» óndiristik kooperatıvi jáne 167 sharýa qojalyǵy men 8 shaǵyn kásipkerlik nysan jumys atqarýda», deıdi Asylbek Qonarov.
Sonymen qatar Kólqaınar aýyldyq okrýginiń ákimi 4 eldi mekenniń aýyz sýmen qamtylǵanyn da jetkizdi. Endi Kólqaınar aýylyndaǵy 18 aýlany aýyz sýmen qamtýdy jeńildetilgen jolmen uıymdastyrý jumystary júrgizilýde. Sondaı-aq aýylishilik gaz qubyrlarynyń qurylysy júrgizilip, aıaqtalǵan. Ákim endi aýyl turǵyndarynyń kótergen máseleleri boıynsha da aldaǵy ýaqytta tıisti jumystar atqarylatynyn aıtty.
Jambyl oblysy
