Tótenshe sessııada 35 memleket qalys qalsa, beseýi qarsy daýys berdi. Máskeýdiń basqynshylyq áreketin aıyptaǵan qujatqa Belarýs, Soltústik Koreıa, Erıtreıa, Sırııa jáne Reseıdiń ózi qarsylyq bildirdi. Qalys qalǵandar qatarynda Kremldiń odaqtastary sanalatyn Kýba men Nıkaragýa, sondaı-aq kórshiles Qytaı bar.
Rezolıýsııada BUU «Reseı Federasııasynyń Ýkraınaǵa qarsy agressııasyna qatty alańdaıtyny» aıtylǵan. «Reseı Federasııasynan Ýkraınaǵa qarsy qarý qoldanýdy dereý toqtatýdy, halyqaralyq turǵyda moıyndalǵan shekaralarynan búkil áskerı kúshterin jedel, tolyǵymen jáne eshqandaı shartsyz shyǵarýdy talap etedi», delingen qararda.
Qujattyń zańdy kúshi joq. Degenmen bul Máskeý men onyń odaqtasy Belarýske halyqaralyq qoǵamdastyqtyń kózqarasyn bildiredi. Qarardy ázirleýge 90-nan astam eldiń ókili atsalysqan. Ony qabyldaý úshin BUU Bas Assambleıasynyń úshten ekisi qoldaýy tıis edi.
Qarar qabyldanǵannan keıin BUU Bas hatshysy Antonıý Gýterrısh sóz sóılep, ahýalǵa qatysty óz pikirin bildirdi. Onyń aıtýynsha, Bas Assambleıa ustanymyn kórsetti. Endigi jerde BUU Bas hatshysy retinde onyń oryndalýyna baryn salatynyn jetkizdi.
«Bas Assambleıanyń aıtary anyq jáne aıqyn. Dál qazir Ýkraınadaǵy qyrǵyndy toqtatý kerek. Dál qazir myltyqtyń dybysy estilmeý tıis. Dál qazir kelissózder men dıplomatııaǵa kezek berý qajet. Ýkraınanyń aýmaqtyq tutastyǵy men egemendigi BUU Jarǵysyna sáıkes saqtalýy kerek. Ýaqyt joǵaltýǵa bolmaıdy. Qaqtyǵystyń aýyr zardaptary anyq kórinedi», dedi A.Gýterrısh.
Bas hatshy Ýkraınadaǵy ahýaldyń kúrdeli bolyp turǵanyn, jaǵdaı aldaǵy ýaqytta odan ári kúrdelene túsýi múmkin ekenin málimdedi. Ár sekýnd ótken saıyn jaǵdaı qıyndap barady.
«Soǵystyń aımaqtyq jáne jahandyq beıbitshilik pen qaýipsizdikke, koronavırýstan esin endi jınap jatqan álemge tıgizetin saldarlaryna qatty alańdaımyn. Búgingi qarar basty shyndyqty kórsetedi. Álem Ýkraına halqynyń japa shekkenin qalamaıdy», dedi ol.
Sondaı-aq A.Gýterrısh gýmanıtarlyq kómek qolyn sozǵan kórshiles elderge alǵys aıtty. Osyndaı qarjylandyrýdyń arqasynda mańyzdy dári-dármek pen medısınalyq quraldar, azyq-túlik, taza aýyz sý jetkizýge múmkindik molaıtynyn atap ótti.
«Soǵys qımyldaryn dereý toqtatýǵa jáne beıbitshilik úshin shuǵyl kelissózder júrgizýge úles qosý úshin qolymnan kelgenniń bárin jasaımyn. Ýkraına halqyna beıbitshilik óte qajet. Al dúnıe júzindegi adamdar sony talap etedi», dedi A.Gýterrısh.
Ýkraınanyń turaqty ókili Sergeı Kıslıs «bul meniń soǵysym emes» degen syltaýmen qalys qalýdy jón kórgen elderge úndeý tastady. «Bul qate pikir. Jamandyq eshqashan toqtamaıdy. Jaýlap alǵan saıyn arany ashyla beredi. Buǵan tózseńizder, ol odan ári ilgerileı beredi. Qarar jobasy ony Ýkraınada toqtatýǵa jáne odan ári ketpeýine qajet qadam», dedi S.Kıslıs.
Aıta keterligi, Bas Assambleıanyń tótenshe sessııasynda sóılegen spıkerlerdiń bári soǵysty aıyptady. Amerıka Qurama Shtattarynyń BUU-daǵy ókili Lında Tomas-Grınfıld Birikken Ulttar Uıymynyń basty maqsaty soǵystyń aldyn alý ekenin jetkizdi. Onyń aıtýynsha, Reseı soǵystaǵy qatygezdikti arttyrýǵa daıyndalyp jatyr. Osy oraıda, Tomas-Grınfıld Kremldiń kassetalyq oq-dáriler men vakýýmdyq bombalar, jappaı qyryp-joıatyn qarý-jaraqtardy Ýkraınaǵa tasymaldap jatqanyna toqtaldy.
О́z kezeginde Reseıdiń BUU-daǵy turaqty ókili Vasılıı Nebenzıa Ýkraınadaǵy ahýal soǵys emes, «áskerı is-qımyl» degen sózin taǵy bir márte qaıtalady. Alaıda beıbit turǵyndardyń kún saıyn qalaı qyrylyp jatqanyn kórgen halyqaralyq qoǵamdastyq mundaı syltaýǵa qulaq asqan joq.
Reseıdiń Ýkraınaǵa basyp kirýin aıyptaıtyn qujat buǵan deıin BUU Qaýipsizdik Keńesinde talqylanyp, daýys berilgen edi. Degenmen ol kezde Reseı tarapy qararǵa veto qoıdy. Sondyqtan ol qabyldanbaı qaldy. Esterińizge sala ketsek, BUU Qaýipsizdik Keńesiniń bes turaqty múshesinde – AQSh, Reseı, Ulybrıtanııa, Qytaı jáne Fransııada veto qoıý quqyǵy bar. Keńeske múshe 14 memleket qujatty qabyldasa da, aty atalǵan memleketterdiń bireýi qarsy shyqsa, onda qarar qabyldanbaıdy.
AQSh-tyń BUU-daǵy elshisi Lında Tomas-Grınfıld BUU Qaýipsizdik Keńesi qarary qabyldanbaǵannan keıin narazylyǵyn jasyrǵan joq. «Reseı bizdiń daýysymyzǵa veto qoıa almaıdy. Reseı Ýkraına halqyna veto qoıa almaıdy. Reseı BUU Jarǵysyna veto qoıa almaıdy. Reseı jaýapkershilikke veto qoımaıdy da, qoıa da almaıdy», dedi ol.
Al BUU Bas Assambleıasynda eshqandaı memleketke mundaı basymdyq berilmegen. Árbir eldiń bir daýysy bar. Aıta keterligi, BUU Bas Assambleıasynyń tótenshe sessııasy 1950 jyldan beri 11 márte ǵana shaqyrylǵan. Sońǵy ret 1982 jyly osyndaı jıyn ótken bolatyn.
