Is-sharaǵa arnaıy kelip qatysqan óńir basshysy Jeńis Qasymbek qasiretti qańtarda qoǵamdyq tártipti saqtaý kezinde qaza tapqan sarbazdardyń erligin atap ótip, olardyń týystaryna Otannyń naǵyz patrıottaryn tárbıelegeni úshin alǵys sezimin jetkizdi. Sonymen birge qazaqstandyq belgili sýretshi batyrlardyń beınesi salynǵan portretterin ata-analaryna tabys etti.
Budan bólek pandemııa kezinde erlik isterimen, jankeshti eńbegimen kózge túsken eriktiler men donorlar, mesenattar, polısııa qyzmetkerleri men órt sóndirýshiler, jýrnalıster syı-qurmetke bólendi.
Oblys ákimi bul mamandyq ıeleriniń táýlik boıy jumys istep, ózara kómek pen yntymaqtastyqtyń úlgisin kórsetkenin jáne olardyń muny júrek qalaýymen jasaǵandyqtaryn aıtty.
– Synaqtyń qıyn kúnderinde óziniń azamattyq jáne kásibı boryshyn adal atqarǵan árbir adam shynaıy alǵys pen jyly lebizge laıyq dep sanaımyn, – dedi J.Qasymbek.
«Otzyv» qaıyrymdylyq qorynyń negizin qalaýshy Aleksandr Korogodov aýrý balalardyń analary qońyraý shalyp, kórsetilgen kómektiń sharapaty tıgenin aıtqanda, árdaıym boıdy shattyq bıleıtinin aıtty.
– Bul bizderdi keremetteı shabyttandyrady jáne ilgeri jyljýymyzǵa kómektesedi. Jaqsylyq jasaý – kóńilimniń hoshy, – dedi ol aǵynan jarylyp.
Alǵys aıtý kúniniń qarsańynda cheshen-ıngýsh ulttyq-mádenı ortalyǵy qaıyrymdylyq aksııasyn uıymdastyryp, 225 kópbalaly otbasy men jalǵyz basty analarǵa qoldaý kórsetkeni belgili boldy. Al osy isterge uıytqy bolǵan ortalyq tóraǵasy Ývaıs Djanaev kópetnosty halqymyzdyń birligi Alǵys aıtý kúniniń mańyzdy faktorlarynyń biri ekenin erekshe atap ótti.
QARAǴANDY
