Saıyp kelgende, álemdik básekege qabiletti jáne zamanaýı ınnovasııalyq tehnologııaǵa arqa súıeıtin ekonomıkany ornyqtyryp, onyń únemi ilgerilep otyrýy úshin eń áýeli, memlekettik sharýashylyqtyń barlyq salasynda óz isin jetik biletin bilikti mamandar qajet ekeni aqıqat. Bul rette Memleket basshysy atap kórsetkendeı, jańa ekonomıka qurý úshin joǵary oqý oryndarynyń básekege qabilettiligin kúsheıtýdiń mańyzy zor. Endeshe, kadrlar daıarlaý sapasyn arttyrý basty talaptardyń biri desek, otandyq bilim berý júıesine qatysy bar mekemelerdiń qaısysy bolsyn óz mindetterin osy ólshem turǵysynan baǵamdaýy, ómirdiń ózinen týyndap otyrǵan sharttarǵa saı áreket jasap, oń nátıjege jetýdi maqsat tutýy kerek dep oılaımyn.
Ult bolashaǵy – bilikti, mádenıetti, alǵyr jastardyń qolynda. Bilimi tereń jas tolqynnyń el ishinde básekege qabiletti bola alatyny, tolaıym tabystarǵa jetip, laıyqty ómir súrý úshin de múmkindigi joǵary turatyny daýsyz.
Memleket basshysynyń «tehnıkalyq mamandyqtarǵa basymdyq berip, ınjenerlerdiń, ónerkásipshilerdiń jańa býynyn ósirýimiz kerek» degen sózderin ábden quptaýǵa bolady. Bul baǵdar stýdentterge, joǵary oqý oryndarynyń barsha qyzmetkerlerine erekshe jiger qosqanyn atap ótkim keledi.
Memleket basshysynyń joǵary oqý oryndarynda bilim sapasyn arttyrýdyń barlyq múmkindigin qarastyrý jáne stýdentterdi jataqhanamen qamtamasyz etý jóninde bergen tapsyrmalaryn júzege asyrý – biz úshin birinshi kezektegi mindet.
Taıaýda Qazaqstan men Reseı prezıdentteriniń kezdesýinde respýblıkamyzda ınjenerlik-tehnıkalyq sala boıynsha joǵary bilikti mamandardyń qajettigin eskere otyryp, bilim berý salasyndaǵy yntymaqtastyqqa erekshe mán berildi. Kelissóz qorytyndylary boıynsha qol qoıylǵan qujattardyń deni bilim berý, sıfrlandyrý, ǵaryshty ıgerý jáne atom energetıkasy salalary boıynsha mamandar daıarlaýǵa qatysty boldy. Munyń bári barsha qazaqstandyqtar úshin qýantarlyq jaıt.
Sóz joq, biz úmitpen kútip otyrǵan jańa qoǵamnyń halyq múddesine saı damýy úshin bilikti, bilimdi, ozyq oıly mamandar qajet. Bizdiń mindetimiz – osy maqsatqa qyzmet etý.
Qasym-Jomart Toqaev: «Bárimiz tutas el bolyp, Jańa Qazaqstandy quraıyq! Jańa Qazaqstan – barshamyzdyń ortaq úıimiz, onyń irgesin birge qalaıyq! Bul óskeleń urpaq úshin kerek», dedi. Prezıdenttiń bul sózderinen elimizdiń aldynda negizgi qandaı mindet turǵanyn anyq ańǵarýǵa bolady. Al búgingi qoǵamymyzdyń osy mindetti óz deńgeıinde eńserýge áleýeti tolyq jetetinine senim mol.
Talǵat QULAJANOV,
Almaty tehnologııalyq ýnıversıtetiniń rektory,
Ulttyq ǵylym akademııasynyń akademıgi
