О́ńirdegi barsha áıelder qaýymyn ataýly merekemen quttyqtaǵan aımaq basshysy áıel zaty qazirgi qoǵamnyń qaı salasynda bolsyn erekshe oryn alatynyn atap ótti.
– Eger Qostanaı oblysy týraly aıtatyn bolsaq, bizdiń áıelder óńirdiń qoǵamdyq jáne saıası ómirine belsendi qatysady. Búginde barlyq deńgeıdegi máslıhattardyń 267 depýtatynyń 40 paıyzy áıelder. Qazir oblysta 5,5 myńnan astam memlekettik qyzmetshi bar desek, onyń 60%-y – qyz-kelinshekter. Jergilikti atqarýshy organdarda 155 áıel basshylyq laýazymdarda qyzmet atqarady. Onyń ishinde oblys ákiminiń orynbasary, 6 oblystyq basqarmanyń basshylary, qala jáne aýdan ákimderiniń 22 orynbasary jáne apparat basshylary, 31 aýyldyq okrýg ákimi bar. Qazirgi Qazaqstannyń azamatshalary asa belsendi ári jan-jaqty. Áıelder saıasat, bıznes, bilim men ǵylym, óner men mádenıet, sport sııaqty mańyzdy salalarda joǵary tabystarǵa qol jetkizip, bıikterden kórinip keledi. Alaıda áıeldiń basty mıssııasy – otbasy jylýy men oshaqtyń berekesin saqtaý bolyp qala beredi, – dedi Arhımed Muhambetov.
Merekelik jıynǵa Qostanaıǵa alystan arnaıy shaqyrylǵan aty ańyzǵa aınalǵan aktrısa Merýert О́tekesheva da qatysty. Oblys ákimi kópshilik aldynda qadirli qonaqqa iltıpat bildirip, qurmet kórsetti.
– Merýert Qarataıqyzy О́tekeshova áıgili «Qyz Jibek» fılminde basty róldi somdaǵan birtýar óner qaıratkeri. Qyz Jibek danalyqtyń, sulýlyqtyń, kirshiksiz súıispenshiliktiń etalony bolyp sanalady. Osynda otyrǵan arý analarymyzdyń bári de ulttyq kıno tarıhyndaǵy qaıtalanbas ǵajaıyp týyndyny kóp márte qaıtara kórip, Qyz Jibekke qarap boı túzedi desek qatelespeıtin shyǵarmyz. Al Merýert Qarataıqyzy bizge deıingi jáne bizden keıingi zamandaǵy qazaq qyzdaryna úlgi bolyp qala beredi, – dedi aımaq basshysy.
Oblys ákimine, jalpy Qostanaı jurtshylyǵyna rızashylyq bildirgen Merýert О́tekeshova Tobyl óńirine osymen ekinshi ret kelip otyrǵanyn aıtty.
Sán-saltanat pen alqyzyl gúl shoqtaryna toly merekelik is-sharanyń sońy óńir ónerpazdary ázirlegen konserttik baǵdarlamaǵa ulasty.
QOSTANAI
