Fýtbol: úshinshi týrdyń oıyndary oınaldy

Búgin, 29 naýryz kúni fýtboldan Qazaqstan premer-lıgasynda úshinshi týrdyń oıyndary oınaldy. Ol ótken týrdaǵy birdeı upaımen alǵa umtylǵan 7 komandanyń 4-in iriktep shyǵardy. Bul týraly ras.kz habarlady. Bar-joǵy 4 gol soǵylýyn tirkegen ótken týrǵa qaraǵanda, bul joly alańdar berekeli boldy. Dálirek aıtqanda, aldyńǵydan 10 dop artyq soǵylyp, jalpy san 14-ke jetti. Buǵan qosa, eki oıynda iri esep ómirge keldi. Búgingi týr saǵat 15:00-de «Ertis» - «Atyraý», «Tobyl» - «Jetisý» arasyndaǵy machtarmen bastaldy. Bir qyzyǵy, eki kezdesýde de meımandardyń mereıleri ústem kórindi. Bulardyń birinshisinde atyraýlyqtar 11-mınýtta Mılosh Trıfýnovıchtiń soqqan goly arqasynda 1:0 esebimen jeńiske jetti. Hazar teńiziniń jaǵasynan kelgen fýtbolshylar bul oıynda aıtarlyqtaı basymdyq tanytty. Al Jetisý jigitteri jeńistiń esebin budan da góri senimdi ete bildi. Olar 45-mınýtta Zarechnyı, 74-mınýtty Shaff salǵan doptardyń kómegimen 2:0 degen esepti tabloda jandyrdy. Sońǵy gol penaltıden salyndy. Arada bir saǵat ótkende, alańǵa «Taraz» - «Shahter» komandalary shyqty. Bul kenshilerdiń naǵyz «shynjyrdan bosanyp» ketkendeı daýyldy oıyny boldy. Qaraǵandylyqtar oıynnyń 70-mınýtynda alań ıelerin 5:0 etip utyp turdy. Sońǵy goldy tarazdyqtar 80-mınýtta salyp, oıynnyń ózderi úshin 1:5 esebimen bolyp aıaqtalýyna qol jetkizdi. Al esep 15-mınýtta Vıchıýstiń golymen ashyldy. 42-mınýtta Qonysbaev esepti 2:0-ge jetkizdi. Sodan soń ekinshi taımda Salomov eki ret (55, 67-mınýttar) alań ıeleri qaqpashysyna darbazadan dop aldyrsa, 70-mınýtta Fınonchenko kózge tústi. Kelesi saǵatta (17:00) «Aqtóbe» - «Spartak», «Astana» - «Qaısar» komandalary matchtaryn bastady. Qazir top basynda kele jatqan aqtóbelikter chempıonat debıýtantyn 3:0 etip tize búktirdi. Oıynda Zenkovıch dýbl (17, 58) jasasa, Shabalın (47) bir gol soqty. Ekinshi oıynnyń sońynda janjal týyp kete jazdady. Alań ıeleri negizgi ýaqyttan keıingi qosymsha ýaqytta aıaq astynan penaltıge qol jetkizip, kezdesýdi 1:0 etip, óz paıdasyna sheship ketti. 11 metrlik aıyp dobyn Damır (meniń attasym!) Koıashevıch saldy. Al báriniń sońynan, 18:00-de oıyndaryn bastaǵan «Qaırat» pen «Ordabasy» arasyndaǵy teketireste qonaqtardyń jeńiske jetkeni aıan boldy. Tústikten kelgen meımandar 84-mınýtta Iýnýzovıch salǵan doptyń arqasynda jeńis toıyn toılady. Úsh týrdan keıin top basyna «Aqtóbe», «Astana», «Atyraý» jáne «Jetisý» komandalary bólinip shyqty. Damır Qojamqul.