О́rimdeı kezinen qolyna qylqalam ustaǵan armanshyl jan ómir sýretterin óz sezimimen órnektep júr. О́ner bir orynda turmaıtynyn, onyń únemi damyp adam qııalymen birge sharyqtaı beretin shekarasy joq sheksiz álem ekenin áıgi etedi. Zańǵar bıikke kóz salsaq, aspannyń túsi kók ekenin kóremiz. Bálkim, ol sur ıakı qyzyl shyǵar. Biraq biz bul týraly oılanyp kórdik pe? Al qııal qushaǵyndaǵy sýretshi aınaladaǵy ár qozǵalysty ózge qyrynan tanyp, ózinshe paıymdaıdy. Sebebi adam qııalyn shekteý múmkin emes. Bir qyzyǵy, Anardyń qylqalamynda qyzyl-jasyl qulpyrma boıaýlar kóp kezdese bermeıdi. Qandaı taqyrypqa qalam terbese de kók tústi basty reńk retinde paıdalanady.
Jalǵyz tústiń jaryǵymen-aq jan dúnıesin jaıyp salady. Shynynda, bul úlken sheberlik hám onyń keneptegi ózine tán stıli dep qabyldadyq. Tutas oıdyń kolorıtin bir túske baǵyndyrý, shyǵarmanyń mánin sol túspen ashýǵa tyrysý qaıtalaýǵa uryndyrýy múmkin ǵoı degen saýal týyndaýy zańdy. Alaıda sýretshiniń kók tústiń kórkem reńkin ár taqyrypta ártúrli oınata bilýi naǵyz kóńilden shyqqan, júrekpen jazylǵan jandy kartınalardyń bolmysyn kóz aldymyzǵa ákeledi. Nanbasańyz, qarańyz!
Almaty qalasynyń qysqy kórinisterine arnalǵan sýretter toptamasyna úńilip kóreıik. Kók tústiń reń-qasıetterin molynan paıdalanǵan. Ashyq ta qanyq, taza kók tús arqyly qysqy aıazdy, almaly shahardyń aýa raıyn, aq qardan syrǵa taǵynǵan aǵashtar men aq sálde oranǵan ǵımarattardy qalaı dál bederlegen. Almatynyń ásem beınesin aıshyqtaı kele, talaı estelikter tunǵan tanys kóshelerdi kóńiline barynsha jaqyn etip kórsetýge kúsh salady. Al birde aqar-shaqar shyńdardyń baýraıyna qyzǵaldaqtan kilem tósep janyńyzǵa jaz ornatady. Keneptegi beıtanys marjan mekenge ańsaryń aýyp, ertegiler eline enip ketkiń keledi. Áspeti bólek ásem ǵımarattar zaý bıikke qol sozǵan aǵashtarmen áýez tapqan. Tirshilikti únsiz kúıinde qabyldaǵanymen, janary jaqsylyqty ǵana kóretin jannyń álemi de ádemi. Onyń qaǵaz betine túsirgen oılaryn oqyp otyryp, kóńil terezesiniń áıneginen naǵyz shyǵarmashyl adamynyń beınesin kóremiz.
– Kóktem meni aınalanyń bárine ǵashyq etip jyl saıyn gúl bolyp oralady. Bul sezimdi kókiregimde máńgilik saqtap qalǵym keledi. Bala kezden kóńilim aınalamdaǵy boıaýlardy erekshe ásermen qabyldaıdy. Aıaldamadan bastalatyn qala tirshiligi tunjyraǵan aýa-raıymen qosylyp, meni beıjaı qaldyrmaıdy. Tirshilik tynysy kóńilimdegi sezim tereńdiginde boıaý tilimen ún qatyp aq qaǵazǵa túskenshe janymdy arpalysqa salady. Nege ekenin, janym aınaladaǵy álemnen ózgeshe úılesim izdeıdi. Búkil kóńil kúıimdi, jan dúnıemdi óner arqyly syrtqa shyǵaramyn. Múmkin bul barlyq sýretshige tán sezim shyǵar. Adam ómir boıy ózindegi kemshiliktermen kúresip, ony jeńe bilýi shart. Darynyń bolsa da, ony tárbıelep, shyńdaý kerek. Erkin oıly adam ǵana ónerde jasampazdyqqa qol jetkizedi, – dep tebirenedi Anar Ábjanova.
Elimizdiń 100 jańa esimderiniń qataryna engen Anar Sýretshiler odaǵynyń múshesi. О́nerdi ómir dep biletin ol ónersúıer qaýymǵa óziniń ondaǵan jeke kórmesin usynyp úlgerdi. AQSh, Chılı, Fransııa, Italııa, Reseı memleketterinde ótken halyqaralyq baıqaýlar men plenerlerde qoltańbasyn qalyptastyryp, shyǵarma-
shylyǵyn udaıy damytyp keledi. «Shabyt» festıvaliniń laýreaty. Tabandy eńbek pen kirshiksiz kóńil ǵana ómirdi jarqyn túske boıaıtynyna bek senetin ol myna ǵazız álemge es-tússiz ǵashyq. О́mirge ińkár sýretshiniń qoltańbasyna úńilgen saıyn sizdiń de keýdeńizdi úmit pen senim, mahabbat pen qýanysh kerneıdi. Anardyń kenebinen kóktemniń ıisi ańqıdy.
ALMATY
