Sýretshiler men músinshilerdiń shyǵarmashylyǵyna shabyt syılaǵan áıel týraly taqyryptyq kórme jadyraǵan kóńil hoshynan týǵan optımıstik muratqa negizdelgen ári shabytty shyǵarmalardyń ózegindegi súıispenshilik pen mahabbatty tanýǵa shaqyrady. Tamara Volkovanyń «Sáýkele kıgen qyz», «Kóktem», «Keshki Almaty», Tilek Chýdenovtiń «Áıel qudireti», Perızat Esnazarovanyń «Dala Madonnasy», Zeınelhan Muhametjannyń «Áýen-2», Ádilhan Jarqynbekovtiń «Jastyq», Raýan Súleımenovtiń «Naýryz-dýman» atty týyndylary boıaý túsimen erekshelenip, sýret óneriniń túrli stılinde oryndalsa da, áıelge degen mahabbat, sulýlyqqa ińkárlik olardyń bárine ortaq ıdeıa qyzmetin atqarady.
Gobelen, grafıka, akvarel, qoldanbaly óner túrindegi keskindemelerdegi ártúrli jastaǵy, ár áleýmettik toptaǵy áıel janarynda tunǵan mahabbat pen baqyt shýaǵy, oı tuńǵıyǵy onyń keńistiktiń jumbaq bir bólshegi ekenine, ony sheshýdiń múmkin emesin tuspaldap turǵandaı. Ádemi áıelderdi toptastyrǵan kórmeni aralap júrgen adam ishteı ózine: «eń ádemisi qaısy?» dep jasyryn saýal qoıǵanyn ańdamaıdy jáne oǵan: «júrekte ómir súrip júrgeni emes pe?» dep jyldam jaýap qatyp, sheber qylqalam ıesin shabyttandyrǵan shyǵarma aldyna qaıyra kelip, tereńirek úńilip, óz ishindegi parasat pálsapasymen úndestire, qaıta zer salady.
ALMATY
