Qaraǵandy oblysyndaǵy tasqynda 6 adam aýrýhanaǵa jatqyzyldy

Qaraǵandy oblysy Buqar jyraý aýdanyndaǵy Kókpekti sý qoımasyndaǵy plotınanyń jyrylyp ketýine baılanysty týyndaǵan tasqynnyń saldarynan 9 adam aýrýhanaǵa jatqyzyldy. Bul týraly Qaraǵandy oblysy tótenshe jaǵdaılar departamentiniń baspasóz qyzmeti habarlady. «Qaraǵandy oblysy Kókpekti sý qoımasyndaǵy tótenshe jaǵdaılardy joıý jónindegi jumystar jalǵasyp jatyr», - delingen habarlamada. Qazir jaǵdaıdy 7 baǵytta zertteý maqsatynda tótenshe jaǵdaılar, ishki ister organdary, ákimdikter, densaýlyq saqtaý salasy qyzmetkerlerinen quralǵan 7 top qurylyp, jumys jasaýda. Bolǵan oqıǵanyń zardaptaryn joıyp, turǵyndardy qaýipsiz jerlerge kóshirý jumystaryna Tótenshe jaǵdaılar mınıstrligi medısınalyq apat bólimsheleriniń, azamattyq qorǵanys polkiniń  150-den astam adamy men 19 qutqarýshylar tehnıkasy, sondaı-aq ishki ister basqarmasynyń 20 adamy men 4 tehnıkasy, densaýlyq saqtaý basqarmasynyń 30 adamy men 10 tehnıka birligi, jergilikti atqarýshy organdardyń 10 adamy men 3 tehnıkasy qatysýda. Tótenshe jaǵdaılardy joıý jónindegi shtab jumysyna Tótenshe jaǵdaılar mınıstri Vladımır Bojko basshylyq jasaýda. Kókpekti aýylyndaǵy shtabtyń janynda medısınalyq pýnkt jumys istep tur. Oǵan 9 adam kómek surap kelse, olardyń 6-y shuǵyl aýrýhanaǵa jatqyzyldy. Murat Aıtqoja. Derekkóz: Qaraǵandy oblysy tótenshe jaǵdaılar departamentiniń baspasóz qyzmeti. Foto: yk.kz.