Májilistiń Zańnama jáne sot-quqyqtyq reforma komıtetiniń múshesi Janna Telpekbaevanyń aıtýynsha, pandemııa jáne halyqtyń qashyqtan jumys rejımine kóshýi kezeńinde kórsetiletin baılanys qyzmetteri sapasynyń mańyzdylyǵy artty. Ol azamattardan ınternet sapasyna kóbirek shaǵym túsetinin atap ótti.
Máselen, Ákimshilik quqyq buzýshylyq týraly kodekstiń 637-baby boıynsha iri kásipkerlik sýbektileri úshin nashar qyzmet kórsetkeni úshin 100 AEK, al bir jyl ishinde qaıtalap buzǵany úshin 200 AEK-ti quraıdy.
«Bul rette iri kásipkerlik sýbektisi buzýshylyq faktisin tanyǵan kezde 50%, ıaǵnı 50 nemese 100 AEK mólsherinde aıyppul tóleýge mindetti. Kóbinese operatorlar qosymsha jabdyqty ornatýdan góri aıyppuldyń jartysyn tóleý yńǵaıyn tabady. Saıyp kelgende, baılanystaǵy barlyq qolaısyzdyqtar operator aldyndaǵy óz mindettemelerin turaqty negizde oryndaıtyn, ıaǵnı tarıfti tolyq kólemde tóleıtin abonentterge áser etedi», dedi komıtet múshesi.
Depýtat zań jobasy operatorlardyń tehnıkalyq parametrlerge sáıkes kelmeıtin baılanys qyzmetteri men ınternetke qoljetimdilik úshin jaýapkershiligin kúsheıtýge múmkindik beretinin atap ótti.
«Kórsetilgen quqyq buzýshylyq úshin ákimshilik aıyppuldy 1000 AEK-ke deıin (3 063 000 teńge) jáne bir jyl ishinde qaıtalap jasalǵan buzýshylyq úshin - 1500 AEK-ke deıin (4 594 500 teńge) arttyrý azamattardyń sapaly baılanys jáne ınternet qyzmetterin alý quqyǵyn qorǵaýǵa, operatorlar arasynda básekelestik úshin qosymsha jaǵdaılar jasaýǵa múmkindik beredi», dep qosty Janna Telpekbaeva.
