QR SIM gýmanıtarlyq qyzmet Qazaqstannyń syrtqy saıası strategııasynyń mańyzdy baǵyty bolyp tabylatynyn aıtty.
«Bizdiń elimiz ár túrli jaǵdaılarǵa baılanysty halqy qıyn gýmanıtarlyq jaǵdaıǵa tap bolǵan elderge múmkindiginshe qoldaý kórsetýge tyrysady», delingen QR SIM baspasóz qyzmeti taratqan habarlamada.
Qazaqstan dástúrli túrde basqa memleket tarapynan resmı úndeýge jaýap retinde gýmanıtarlyq kómek kórsetedi. Ýkraına tarapynan osyndaı ótinish túsken soń Prezıdent Qasym-Jomart Toqaev ýkraın halqyna shuǵyl gýmanıtarlyq kómek kórsetý jóninde naqty tapsyrma berdi.
«Gýmanıtarlyq kómektiń salmaǵy 82 tonnany quraıdy. Qazirgi ýaqytta bul júkti mejeli jerge jetkizý máselesi pysyqtalýda. Aıta ketsek, Ýkraına aýmaǵyna júkterdi jetkizý óte qıyn prosess. Osyǵan baılanysty Qazaqstan Úkimeti Ýkraınaǵa halyqaralyq gýmanıtarlyq kómek alý jáne bólý úshin habtar ornalastyrylǵan kórshi memlekettermen ýaǵdalasady», dep qosty QR SIM baspasóz qyzmeti.
