Bul sezden kópshilik ózgeris, jańa bastama kútti. Májilis Tóraǵasy Erlan Qoshanov Nur Otan partııasynyń atyn Amanat dep ózgertýdi usyndy. Partııany elmen birge jańartý, uıymnyń qyzmetin jańa mazmunmen tolyqtyrý kerek degen usynysty delegasııa músheleri de qoldady.
Prezıdent Qasym-Jomart Toqaev astarynda úlken máni bar «Amanat» sóziniń maǵynasy tereń ekenin, elimizdiń tarıhy men mádenıetinde aıryqsha sımvoldyq máni bar ekenin, qýatty memleket pen ortaq ulttyq birlik qundylyqtaryn bildiretinin atap ótti.
Prezıdent partııa ataýynyń ózgertilýimen ǵana toqtamaı, partııa múshelerinen naqty nátıje talap etip otyr.
Sezd barysynda partııanyń 7 negizgi baǵyty qabyldandy. Ol boıynsha partııa múshelerine joǵarydan tapsyrma kútip otyrmaı, jergilikti halyqpen tyǵyz jáne ashyq jumys isteý, bergen ýádelerdi sóz jáne qaǵaz júzinde ǵana emes, is júzinde iske asyrý sekildi naqty mindetter men partııanyń jas qanatyn jańartý máselesi sóz boldy. Bul júıeli jeti baǵyt partııanyń jumys barysyn ári qaraı jandandyrýǵa negiz bolmaq.
Babalar ańsap, keıingige mura qaldyrǵan amanatyn odan ári jetkizýge Amanat partııasy óz úlesin qosady dep oılaımyn. Bul – Prezıdentimizdiń Jańa Qazaqstan qurýǵa, jańa urpaqtyń jolyn ashýǵa jasaǵan qadamy.
Abzal BEKBOSYNOV,
Nur-Sultan qalalyq advokattar alqasynyń múshesi
