Adam árqashan erteńinen jaqsylyq kútedi. Qyzyqtyń bári alda sııaqty kórinedi. Erteńnen bastap baqytty bolýǵa, erteńnen bastap jaqsy ómir súrýge tyrysasyń. Soǵan senesiń. Bir sát kóńiliń qulazyp qalsa, «búgin jylap alaıyn, erteńnen bastap muńaımaımyn» deısiń. О́z-ózińe sert beresiń. Al aqyndar aldaǵy ýaqytta áıteýir bir jaqsy óleń jazatynyna senedi. Jazýshy jaqsy shyǵarma jazatynyna senedi. Ǵashyq adam sol jannyń bir kelerine senedi. Bálkı, telefon shalar, hat jazar, pıon gúlin syılar, oǵan batyly jetpese, «M-ǵa» dep óleń jazar... Iá, adam ýaqytqa úlken úmit artady (ýaqyt sony bile me eken?..) Sodan bolar keıde adamǵa qysqa ǵumyry da uzaq bolyp kórinedi.
Bilesiz be, siz kútken osy sátterdiń bári kóktemde bolýy múmkin. Qar astynan búr jarǵan báısheshekpen birge sizdiń jaqsy estelikterińiz de ómirge kelgen bolar. Jer jipsip, Kóktemniń ıisi kóńil sergiter ýaqyt bárimizdiń arman-mezgilimiz. Júrekte jınalǵan ókpe, renish, qaıaý, jas, muńdy kóktemniń jyp-jyly jańbyry shaıyp keterdeı kútesiń. Sýyǵan, jaýraǵan, saǵynǵan, umytylǵan sezimdi kóktemniń tamyzyq aýasy jylytardaı. Al qustar salǵan kóktem áni seniń ánińdeı...júrek sózińdeı. Sol senimmen, sol úmitpen ishteı kóktemge daıyndalasyń. 1 naýryzda Kúnge sálem beresiń. «О́mir degen – Kúndi aınalý» dep Serik Aqsuńqarulynyń óleńin qaıta oqısyń. Al qyzdar endi bári ózgeretindeı shash qııady, jańa kóılek kıedi. Bári kóńil kúı úshin, ishki jan dúnıeńniń úılesimi úshin. Qyzyq.
Jer-ana býsanǵan shaqta ǵaryshta da erekshe qubylystar oryn alady. Ǵalymdar bul kezeńdi «galaktıka maýsymy» dep ataıdy. Kóktemde aspannan jarqyraı kórinetin juldyz – Sholpan (Venera). Kún men Aıdan keıingi eń jaryq juldyzdy ashyq aýa raıynda, tipti kúndiz de kórýińiz múmkin. Ágárákı, kóktemniń alǵashqy kúnderinde Aı janynan aspanǵa túımedeı bolyp qadalǵan Sholpandy kóre qalsańyz, mindetti túrde jaqsy tilek tileńiz. Eń jaryq juldyz ózine qol sozǵan ár jannyń sózin estıdi, janyn túsinedi, únsiz ǵana syrlasady, bálkı jubatar.
