«Osy jyldyń 11 qańtarynda Memleket basshysy halyqtyń jumyspen qamtylýy máselesine toqtalyp, halyqtyń tabysyn arttyrý baǵdarlamasyn ázirleýdi tapsyrdy. Osy tapsyrmany oryndaý maqsatynda Ulttyq ekonomıka mınıstrligi memlekettik organdarmen, Ulttyq kásipkerler palatasymen jáne sarapshylyq qaýymdastyqpen birlesip, kedeıshilik pen jumyssyzdyq deńgeıi boıynsha naqty jaǵdaıǵa taldaý júrgize kele, tıisti baǵdarlama jobasyn ázirledi. Taldaý nátıjeleri boıynsha turaqty oń dınamıkaǵa qaramastan, sońǵy eki jylda halyqtyń aqshalaı tabysynyń ósý qarqyny 2019 jylǵy 6,4 paıyzdan 2021 jyly 2,9 paıyza deıin baıaýlaǵany baıqaldy», dedi mınıstr.
Mınıstr óz sózinde halyq tabysynyń qurylymynda eńbek etýden túsetin kiristerdiń tómendeýi jáne áleýmettik transfertterden kiristerdiń ósýi baıqalatyndyǵyn jetkizdi.
«Halyqtyń eńbek etýden túsetin tabysynyń úlesi sońǵy 10 jylda 10,8 paıyzdyq tarmaqqa tómendedi. О́z kezeginde, áleýmettik transfertterdiń úlesi kerisinshe, 10 paıyzǵa ósti. Júrgizilgen taldaýdy eskere otyryp, Halyqtyń tabysyn arttyrý baǵdarlamasynda myna basymdyqtar belgilendi:
- jumysshy jastar sanyn arttyrý;
- halyqtyń áleýmettik osal toptarynyń jekelegen sanattaryn jumysqa ornalastyrý;
- bıýdjet jumyskerlerine laıyqty jalaqy taǵaıyndaý;
- eńbek kirisindegi teńgerimsizdikterdi joıý;
- aýyl sharýashylyǵynda, óńdeý ónerkásibinde tıimdi jumyspen qamtýdy damytýdy yntalandyrý;
- kásipkerlik kiristiń ósýin yntalandyrý;
- tabystyń satyp alý qabiletin qorǵaý», dep túsindirdi Álibek Qýantyrov.
Mınıstrdiń aıtýynsha, Úkimettiń búkil ekonomıkalyq saıasatynyń jalpy maqsaty halyq tabysyn arttyrý bolǵandyqtan, baǵdarlama ulttyq jobalarmen ózara baılanysty. Baǵdarlama aıasyndaǵy is-sharalardy shartty túrde tikeleı jáne janama dep bólýge bolady. Tikeleı is-sharalar bıýdjet jumyskerleriniń jalaqysyn kóterýge jáne kiristerdegi teńgerimsizdikti teńestirýge, al janama is-sharalar halyqty jumyspen qamtýǵa járdemdesý, kásiptik daıarlaý (qaıta daıarlaý), óńdeýshi kásiporyndardyń ónimdiligin arttyrý jáne kásipkerlikti damytý arqyly tabystyń ósý múmkindikterin keńeıtýge baǵyttalǵan.
