Osydan tórt jyl burynǵy Phenchhan Paralımpıadasynda otandastarymyz bir altyn medal oljalap, jalpykomandalyq esepte Qytaı quramasymen birge 20-oryndy ózara bólisken edi. Al bıyl jarys qojaıyndary 18 altyn medalmen týrnır kestesinde jeke dara kósh bastady. Soly jyly shańǵy básekesinde jarys jolyna shyqqan qazaqstandyq Aleksandr Kolıadın 1,5 shaqyrymdyq sprıntte aldyna jan salmaı, Qazaqstan Paralımpıada tarıhyndaǵy alǵashqy altyn júldeni jeńip alǵan-dy. О́kinishke qaraı, ol byltyrdan bastap úsh jylǵa jarystardan shettetilgenine baılanysty bıylǵy Paralımpııa oıyndaryna qatysa almady.
Beıjińdegi Aq oıyndarda Qazaqstan quramasynyń qorjynyna jalǵyz júldeni parabıatlonnan 10 shaqyrym qashyqtyqta baq synaǵan Aleksandr Gerlıs saldy. Altyn júldeni kanadalyq Mark Arends jeńip alsa, ýkraınalyq Grıgorıı Vovchınskıı kúmiske qol jetkizdi. Paralımpııa oıyndarynyń aldynda birqatar sport mamandary dál osy petropavldyq shańǵyshy Beıjińdegi oıyndarda el qorjynyna júlde salýy múmkin ekenin boljaǵan edi. Aýzy dýaly sarapshylardyń aıtqany aıdaı kelip, 32 jastaǵy A.Gerlıs el mereıin asyryp, Qytaıda kók týymyzdy bıikte jelbiretti. Álemdik reıtıngte TOP-5 sportshynyń qatarynda turǵan Aleksandr osydan tórt jyl burynǵy Phenchhan Paralımpıadasynda da shańǵy jáne bıatlon básekesinde óner kórsetip, tórt márte úzdik jeti sportshynyń qatarynan kóringen bolatyn.
Sonymen qatar Aleksandr Gerlıs bıylǵy Aq oıyndarda tórt márte fınaldyq kezeńge joldama alyp, barlyǵynda da jarysty besinshi orynmen túıindedi. Alǵash parashańǵy jarysynyń sprınt básekesinde márege besinshi bolyp jetken ol birinshi orynǵa ıe bolǵan qytaılyq sportshydan eki mınýtqa qalyp qoısa da, munyń aldynda parabıatlonnan Paralımpıada chempıony atanǵan kanadalyq Mark Arendsti basyp ozdy. Keıinnen parabıatlonnan jekeleı jarysta da dál osyndaı nátıje kórsetti. Bas júlde fransııalyq Bendjamın Davege buıyrdy. Parashańǵydan orta qashyqtyqta da A.Gerlıs fınalda óner kórsetkenimen, bul joly da besinshi orynmen túıindedi. Al parashańǵy estafetasynda Erbol Hamıtovpen birge baq synaǵan bizdiń jigitter taǵy da sol mejeden kórindi.
Osylaısha, Aleksandr Gerlıs Paralımpıadada bir qola jáne bes márte besinshi oryndy oljalap qana qoımaı, memleket tarapynan beriletin 115 myń AQSh dollary kólemindegi syıaqyǵa da ıe boldy. Al estafetada besinshi oryn alǵan Erbol Hamıtovke 10 myń AQSh dollary beriledi. Aıta keteıik, bıylǵy Paralımpııa oıyndarynda el namysyn Erbol Hamıtov, Aleksandr Gerlıs, Sergeı Ýsolsev, Iýrıı Berezın jáne Denıs Petrenko qorǵaǵan bolatyn. Paralımpıadanyń ashylý saltanatynda Qazaqstannyń kók týyn Álem kýbogynyń qola júldegeri Erbol Hamıtov ustap shyqty.
Medal jıyntyǵy boıynsha jalpykomandalyq esepte alǵashqy úsh oryndy Qytaı (18 altyn, 20 kúmis, 23 qola), Ýkraına (11+10+8) jáne Kanada (8+6+11) quramalary ıelendi. Endi tórt jyldan keıin ótkiziletin kezekti Qysqy Paralımpııa oıyndarynyń jalaýy Italııanyń Mılan jáne Kortına-d’Ampesso qalalarynda jelbireıdi.
