Ekologııa, geologııa jáne tabıǵı resýrstar mınıstrliginiń aqparatyna sáıkes «Eýrazııa» halyqaralyq jobasynyń 1-shi kezeńin iske asyrý úshin Kaspııdiń qazaqstandyq bóligindegi oıpatynda geologııalyq-geofızıkalyq málimetterdi óńdep, ozyq jáne ınnovasııalyq tehnologııalaryn paıdalaný arqyly kelesi kezeńderine jetekshi munaı-gaz kompanııalarynyń qatysý múmkindigi qarastyryldy.
Ekologııa, geologııa jáne tabıǵı resýrstar mınıstri Serikqalı Brekeshev ekonomıkalyq turaqtylyqty qamtamasyz etýde atalǵan jobany júzege asyrýdyń mańyzy zor ekenin jetkizdi.
Bıyl Kaspıı mańyna baılanysty qolda bar barlyq geologııalyq-geofızıkalyq málimetti ozyq jáne ınnovasııalyq tehnologııalardy qoldanyp, qaıta óńdeý men túsindirý jónindegi jumystar júrgiziledi. Sondaı-aq odan arǵy jumystardy naqtylaý úshin Kaspıı mańy oıpaty shegindegi neǵurlym perspektıvaly aımaqtardy anyqtaıtyn esep oryndalyp jatyr.
2-3 kezeńderde óńirlik seısmıkalyq beıinderdi, seısmıkalyq emes aerogeofızıkalyq zertteýlerdi pysyqtap, perspektıvaly bólimshelerdi shynaıy geologııalyq zertteý jáne basseın túbindegi nysandardy izdeý maqsatynda ozyq ınnovasııalyq tehnologııalardy paıdalanyp, alynǵan derekterdi óńdeý men anyqtalǵan aımaqta tereń izdeý uńǵymasyn burǵylaý kózdeledi.
Qazaqstandyq munaıshy-geologter qoǵamynyń prezıdenti Baltabek Qýandyqov jobanyń 1-shi kezeńi boıynsha oryndalyp jatqan jumystardyń alǵashqy nátıjelerin usynyp, tarıhı derekterdi zamanaýı tehnologııalarmen óńdeý nátıjelerin kórsetti.
Uıym basshysy aıtqandaı, taıaý arada atalǵan joba otandyq energetıkalyq qaýipsizdiktiń irgetasyna aınalyp, kómirsýtek shıkizatynyń strategııalyq rezervin arttyrýǵa jol ashady.
Keńeste osy jobanyń 2-3-shi kezeńderin júzege asyrýda munaı-gaz kompanııalarynyń qatysý sharttaryna erekshe nazar aýdaryldy.
