Almatydaǵy «Turan» ýnıversıtetiniń «Kıno jáne televızııa akademııasy» aıasynda paıdalanýǵa berilgen kınozaldyń ashylýyna rejısserdiń qos qanaty – uldary Eskendir men Muhıt Narymbetovter ǵana emes, ıdeıany júzege asyrýǵa «Ulttyq kınony qoldaý memlekettik ortalyǵy» men Sh.Aımanov atyndaǵy «Qazaqfılm» kınostýdııasy da atsalysyp, otandyq kıno salasynyń qaıratkerleri tutas qoldaý bildirgen. «Ákem tek qazaq kınosynyń tarıhynda ǵana emes, álemdik kınematografııa tarıhynda da óshpes iz qaldyrdy. Bul kınozaldyń ashylýynyń úlken máni bar. Búginde barlyq ónerdiń ishinde kıno óneri aldyńǵy orynǵa shyǵyp, óskeleń urpaqty ózine tabyndyryp, mańyzdy tárbıe quralyna aınalyp otyrǵandyqtan, qazaqstandyq keıingi jas býyn otandyq kınonyń aldyńǵy leginde bolǵan S.Narymbetov týraly bilýge tıis. Sondyqtan bul oqıǵa ákemdi máńgi este saqtaýdyń az ǵana úlesi dep bilemin», dedi kınozaldyń saltanatty ashylý rásiminde alǵashqy sózdiń tizginin alǵan rejısserdiń uly, belgili rejısser Eskendir Narymbetov.
Kınozal búgin ashylǵanymen, rejısserdiń ózi uzaq jyldar boıy «Turan» ýnıversıtetiniń stýdentterine dáris oqýǵa shaqyrylǵan. Ýnıversıtet rektory Rahman Alshanov: «Rejısserdiń ýaqytynyń tyǵyzdyǵyna baılanysty keri shegerile bergen usynystyń oraıy osylaı kelse de, Satybaldy aǵamyz báribir ýnıversıtetimizge keldi» dep, Kıno akademııasy úshin bul zaldyń mańyzy zor ekenin atap ótti. «Elimizde 180 kınoteatr bar. Búginde kınoprokattaǵy otandyq kıno úlesiniń artyp kele jatqanyn eskersek, kórermen úshin mundaı oryndar kerek», deıdi rektor.
Saltanatty sharaǵa Smaǵul Elýbaı, Gúlnar Ábikeeva, Rústem Ábdirash, Álisher Súleımen, Arman Ásenov, Bolat Qalymbetov syndy áriptesteri men shákirtteri qatysyp, azamattyq kózqarasyn aıqyn bildirýdi boryshy sanaǵan rejısserdiń kúreskerlik qasıeti týraly keńinen baıandady. Áıgili Natalıa Arınbasarova, Pankratov-Chernyı, Iýrıı Mamın, Marııam Iаkýbova ýaqyt ótken saıyn orny oısyrap, qımastyq pen saǵynysh sezimin ulǵaıta túsken tulǵaǵa degen júrekjardy esteligin arnaıy daıyndalǵan derekti fılm arqyly joldady. Adamı bolmysy, daryny men shyǵarmashylyǵyna baılanysty jyly estelikterin ortaǵa saldy.
Kınozal zamanaýı qurylǵylarmen jabdyqtalyp, aldaǵy ýaqytta bolashaq rejısserlerdiń shyǵarmashylyq zerthanasyna aınaldyryp, kıno ónerine baılanysty mádenı sharalar ótkizý josparlanǵan.
ALMATY
