Keńes Odaǵynyń Batyry, akademık, jazýshy Málik Ǵabdýllınniń mýzeıi batyr atamyzdyń 80 jyldyǵyna oraı 1995 jyly 5 qyrkúıekte ashylǵan.
Al Keńes Odaǵynyń Batyry Á.Moldaǵulovanyń memorıaldy mýzeıi bolsa, 1985 jyldyń 22 sáýirinde Aqtóbe qalasynda Jeńistiń 40 jyldyǵy jáne batyr qyzdyń 60 jyldyǵy qarsańynda saltanatty túrde ashyldy.
Soǵys pen batyr qyz týraly materıaldardy jınaqtaý men zertteý maqsatynda 1989 jyly mýzeı janynan «Álııa» izdestirý toby quryldy. Top keıinen «Jaýyngerlik baýyrlastyq» izdestirý toby dep ózgertildi. Toptyń maqsaty – qyzyl ásker jaýyngerleriniń múrdelerin taýyp, qurmetpen jerleý, qaza tapqandardyń otbasylaryna jáne mýzeıge soǵys kezinde qoldanylǵan zattardy, qujattardy tapsyrý.
Izdestirýshiler tobynyń jumysy mýzeı qorynyń tolyǵýyna jaǵdaı jasady. Mýzeıge soǵys qarýlary – avtomat, pýlemet, granatalar, patrondar, kaska, medalon, áskerı ydystar, t.b. tapsyryldy.
Qazirgi tańda mýzeı qorynda 10 myńnan astam eksponat tirkelgen. Ekspozısııa jańa eksponattarmen únemi tolyǵyp otyrady. Mýzeıdegi eń qundy eksponattarǵa soǵys kezindegi qujattar men zattar, batyr qyzdyń maıdannan jazǵan hattary, Keńes Odaǵynyń Batyry ataǵy berilgendigi týraly gramotasy jatady.
Jyl saıyn mýzeı 40 myńnan astam kórermendi qaharman qyzdyń erlik, ómir jolymen, Uly Otan soǵysynyń tarıhymen tanystyrady. Mýzeı ashylǵannan beri elimizdiń barlyq óńirinen, alys-jaqyn shetelderden myńdaǵan kórermen mýzeı ekspozısııasymen tanysty.
«Máńgilik eldiń batyrlary» atty saltanatty is-sharada qos mýzeı arasynda Keńes Odaǵynyń Batyrlary Málik Ǵabdýllın men Álııa Moldaǵulovanyń erligin kópshilikke tanystyrý, rýhanı-mádenı baılanysty jetildire túsýdiń taǵy bir ońtaıly ádisi áriptestikti nyǵaıtý bolatyn.
Aqtóbe oblysynyń mádenıet, arhıvter jáne qujattama basqarmasynyń basshysy Altynaı Iýnısova eki mýzeıdiń arasyndaǵy áriptestik yntymaqtastyq aıasynda atqarylýǵa tıisti jumystarǵa sáttilik tilep, rýhanı-mádenı kerýendi alystan arnaıy at arytyp alyp kelgen kókshetaýlyqtarǵa rızashylyǵyn aıtyp, alǵys bildirdi.
Keshte urany men maqsaty bir atalǵan tulǵalyq mýzeılerdiń baǵyty, ishki jumystary týraly aqparat berildi. Qos batyrdyń mýzeıi arasynda yntymaqtastyq memorandýmyna mýzeı basshylary qol qoıdy. Aqtóbelikter men qala qonaqtaryn Málik Ǵabdýllın mýzeıiniń dırektory Serikjan Júzjanova ózderiniń tynys-tirshiliginen habardar etse, batyrdyń ómiri men shyǵarmashylyǵyna arnalǵan «Ǵajaıyp ómir baspaldaqtary» atty jyljymaly kórmesimen mýzeıdiń ǵylymı qyzmetkeri Aıagóz Mahmetova tanystyrdy.
Keshte Sapar Moldaǵulov shejirelerge toqtalyp, esteliktermen bólisti. Kópshilikke otbasy jaıyn, ákesi, Álııa Moldaǵulovanyń naǵashy aǵasy Ábýbákir Moldaǵulovtyń maıdanger qyz balanyń taǵdyry týraly áńgimelerin aıtyp berdi.
Nazerke JOLDIEVA,
Álııa Moldaǵulova atyndaǵy oblystyq memorıaldy mýzeıdiń ǵylymı qyzmetkeri
Aqtóbe oblysy
