Sport kesheniniń ashylý rásiminde oblys ákimi Arhımed Muhambetov quttyqtaý sóz sóılep, aımaqtaǵy sporttyń damýyn tilge tıek etti.
– Sońǵy ýaqytta oblys turǵyndarynyń 38 paıyzy nemese 297 myńnan astam adam, onyń ishinde 80 myń jasóspirim dene shynyqtyrýmen, sportpen turaqty shuǵyldanady. Prezıdent tapsyrmasy boıynsha aımaqta birazdan beri sport baǵytyndaǵy memlekettik tapsyrystar júzege asyrylyp jatyr. Oǵan oblys bıýdjetinen shamamen 500 mln teńge qarastyrylǵan. Bul ótken jylmen salystyrǵanda 2,5 ese artyq. Jattyqtyrýshy-oqytýshylarǵa qosymsha 146 jumys orny qurylyp, 7 myńnan astam jas jetkinshek, onyń ishinde kópbalaly jáne az qamtylǵan otbasylardan shyqqan órender sport seksııalaryndaǵy tegin sabaqtarǵa baryp júr, – dedi A.Muhambetov.
Irgetasy 2020 jyly qalanǵan jańa sport nysanynyń qurylysyn memleket-jekemenshik áriptestigi aıasynda «AstanaGrajdanStroı» kompanııasy júrgizgen. Jobanyń quny 2 mlrd teńgeden asady. Jumsalǵan aqshanyń 30%-y bıýdjetten berilse, 70%-yn bank qarjylandyrdy.
Sport kesheniniń jalpy aýdany 8 myń sharshy metr bolady. Jańa ǵımarat qajetti tehnıkalardyń ozyq túrlerimen jabdyqtalǵan. Basseındegi sý halyqaralyq standartarǵa sáıkes tazartylyp otyrady.
Saltanatty jıynnyń sońy sýda júzýden oblys chempıonatyna ulasty. №1 sport mektebiniń jattyqtyrýshysy Sergeı Goroshenıa jańa basseınde jattyqqan sportshylardyń kóp keshikpeı joǵarǵy nátıjelerge qol jetkizetinine senimdi.
– Buǵan deıingi 25 metrlik qysqa basseınde sportshylardy joǵarǵy deńgeıde jattyqtyrýǵa múmkindik bolmaı keldi. Sondyqtan 50 metrlik basseınde jattyǵatyn ózge óńirlerdegi sportshylarmen jarysqa túsý qıyn. Uzyn basseındegi jattyǵý sportshynyń júzý jyldamdyǵyn arttyryp, tehnıkasyn shyńdaýǵa óte qolaıly, – dedi jattyqtyrýshy.
Qostanaı oblysy
