«Bizdiń elimiz negizgi azyq-túlik taýarlarymen tolyq kólemde qamtamasyz etilgenin jáne dúrlikpe suranys pen úreı úshin sebepter joq ekenin atap ótkim keledi», dedi Premer-Mınıstr Álıhan Smaıylov.
Ol Qazaqstanda ǵana emes, búkil álemde sońǵy jyldary azyq-túlik taýarlaryna suranys pen baǵanyń kúrt óskenin atap ótti. Sondyqtan ol otandyq óndiristi keńeıtý jáne aýyl sharýashylyǵy ónimderin qaıta óńdeý esebinen ishki naryqty taýarlarmen molyqtyrý birinshi orynǵa shyǵatynyn túsindirdi.
«Azyq-túlik qaýipsizdigin qamtamasyz etý máselelerinde birinshi kezektegi mindet - azyq-túlik taýarlarynyń naqty qoljetimdiligin, olardyń dúkender men bazarlardyń sórelerinde jetkilikti bolýyn qamtamasyz etý. Osy baǵytta josparda kózdelgen is-sharalar egis alqaptaryn ártaraptandyrý, mal sharýashylyǵyn keshendi damytý, jańa ınvestısııalyq jobalardy iske asyrý, saqtaý jáne logıstıka ınfraqurylymyn damytý esebinen iske asyrylatyn aýyl sharýashylyǵy ónimderi óndirisiniń kólemin ulǵaıtýǵa baǵyttalǵan», dedi Álıhan Smaıylov.
Bul rette Úkimet basshysy naryqty azyq-túlikpen molyqtyrý jónindegi sharalar azyq-túlik óndirisi men tutyný teńgerimin eskere otyryp júrgizilýge tıis ekenin atap ótti.
«Baǵalardy retteýdiń qoldanystaǵy tetikteriniń tıimdiligine baǵalaý júrgizý jáne baǵalardy ákimshilik retteýden halyqtyń áleýmettik osal toptaryn ataýly qoldaýǵa kóshý jóninde usynystar ázirleý qajet. Baǵalardy tejeýdiń ákimshilik tutqalary naryqtyq emes ádis retinde belgili, baǵa turaqtylyǵyn yntalandyrýdyń basqa ádisterin de paıdalaný qajet», dep qosty Álıhan Smaıylov.
Onyń aıtýynsha, forvardtyq jetkizý júıesin damyta otyryp, AО́K jáne saýda sýbektileri arasynda uzaq merzimdi turaqty sharýashylyq baılanystardy ornatý boıynsha sharalardy qarastyrý qajet.
«Azyq-túlik qaýipsizdigin qamtamasyz etý tizbegindegi mańyzdy býyn - shyǵarylatyn tamaq ónimderiniń sapasy. Bul baǵytta veterınarııalyq jáne fıtosanıtarııalyq baqylaýdy jetildirýdi, tamaq ónimderin sertıfıkattaýdy júrgizý qajet», dep atap ótti Premer-Mınıstr.
