Ispanııalyq «Barselona» sapynda Messıdiń qasyna ilesip, talaı myqty ujymdarǵa mıyqtan kúle qarap júrgen Neımardy túlen túrtti me, kim bilsin?! 2017 jyly «jeke jortyp, jaýǵa shabam» degen ustanymdy ustanyp, «PSJ» fýtbol klýbynyń baı-baǵlan basshylary bólgen 222 mıllıon eýroǵa ózin ózi «satyp alyp», parıjdik komandaǵa taıyp turdy. Osylaısha fýtbol tarıhyndaǵy quny eń qymbat oıynshyǵa aınalyp shyǵa keldi.
Negizi sheıhtar basqaratyn parıjdik komanda Neımardy bir ǵana maqsatpen satyp aldy. Fransııada qarsylastaryn bet qaratpaı utyp júrgen astanalyq klýb chempıondar lıgasyn jeńgisi kelip jelpindi. Sóıtti de Messıdiń kóleńkesine aınalǵan fýtbolshyǵa «jarqyratamyz, altyn dopty sen alasyń» dep jel berdi. О́z kezeginde kóleńkeden kúnge aınalǵysy kelgen Neımaryńyz kelise ketti. Sóıtti de «PSJ» fýtbol klýbynyń jeıdesin kıip, jelge qarsy júzip shyǵa keldi.
«Barselona» sapynda júrgende chempıondar lıgasynyń «qalqanqulaq» kýbogyn basyna kóterip úırengen Neımar «PSJ» sapynda qap-qap jalaqy alǵanymen, túk te tyndyrǵan joq. Jaraqattan kóz ashpaı jatyp aldy. Alańǵa shyqsa da, aıtarlyqtaı nátıjege qol jetkize almady. Isi ónbegenine tisin qaıraǵan ol «Realǵa» aýysqysy keldi, odan qalsa, qaıtadan «Barselonaǵa» barýdy armandady. Shaqshadaı basy sharadaı bolǵan Neımar eki tileginiń de oryndalmaıtynyn bilgen soń «kelesi maýsymda bárin qatyramyn» dep júrgen. Sol kezde «Monakodan» ash bórideı kóringen Kılıan Mbappe degen jas peri keldi. Endi Neımar Kılıannyń kóleńkesine aınalyp shyǵa keldi. Biraq, quny qymbat Mbappeńiz de parıjdik ujymmen chempıondar lıgasyn uta almaıtynyn bildi me, álde keńes beretin myqtylardyń sózin qulaǵyna ildi me, ol jaǵy beımálim. Jazda Madrıdtiń «Realyna» aýysamyn dep baıbalam saldy. Aqyry ketetin boldy. Al parıjdik komanda qabiletinen quny qymbat bolǵan Neımardan qutylýdyń jolyn izdestire bastady. Sátsiz transfer degen sózdi osyndaıda aıtsaq jarasar. Jelge ushqan 222 mıllıon eýro... Neımardyń jalaqysyna jumsalǵan júzdegen mıllıon. Bul transferden salystyrmaly túrde Neımar utylǵan joq. Jaraqat aldym degen jeleýmen jalaqysyn alyp, Parıjdi sharlady, túngi klýbtardy aralady. Qysqasy, Tólegen sende arman joq degen sekildi Parıjden ketse Neımar da armansyz ketedi. Jeńilgen – «PSJ» basshylary. Al Neımar taǵy bir komandaǵa baryp bir jas talanttyń kóleńkesi bola turar...
