Bireýge qurmet kórsetkińiz kelse, aldymen anańyzdan bastańyz. Bala – ananyń baýyr eti. Ol úshin otqa da, sýǵa da túsýge bar. О́zeginen úzilip túsken sábı úshin qan keshýden qoryqpaıdy. Azapty jolda da aqyryna deıin barýǵa bekingen. «Bir qolymen álemdi, bir qolymen besikti terbetken» jan úshin alyp taýdyń ózi alasa kórinedi. Baıqaısyz ba, Qazaqstan beıneleý ónerinde keskindeme shyǵarmalarymen tanylǵan sýretshi Nurlan Qılybaev «Besik jyry» kartınasynda meıirimniń anadan jaratylǵanyn aıtyp turǵandaı. Kishkentaı týyndydan úlken jylylyqtyń lebi esedi.
Jalpy, qylqalam sheberi kez kelgen shyǵarmasynda kórermenniń sezimine, oıyna áser etý arqyly estetıkalyq lázzat beredi. Keskindeme týyndylary jeke bir tulǵany, dara kórinisti beınelep qana qoımaı, kúrdeli sıýjetke, erekshe oqıǵalarǵa qurylǵan jáne onyń mánin ashýǵa beıim. Atalǵan týyn-
dydan sony baıqaýǵa bolady. Aı men kúnniń arasynda sábıin áldılegen ana bar peıilin besiktegi balasyna arnap, dúnıedegi eń baqytty jannyń obrazyn somdap tur.
Negizinde Nurlan Qılybaevtyń shyǵarmalarynyń basym kópshiligi áıel obrazyna arnalǵan. Qaı kartınasyn alyp qarasańyz da áıel beınesiniń kórkemdigimen qatar, qazaqtyń mádenıetin, turmys-tirshiligin, salt-dástúri ári kıim úlgisin kórkemdep jetkizýge qushtar. Qyz balanyń áshekeı buıymdarynyń elementterine asa mán berip, ony beıneleý arqyly ózin zerger sezinedi. Avtordyń shyǵarmalarynan rýhanııatqa aýadaı qajet ulttyq dárýmenderdi tabýǵa bolady.
Eń ǵajaby, ol árbir oıýdyń mán-maǵynasyna tereń úńilip, oqyrmanǵa sol zattyń qasıetin sezindiredi. Týyndylarynyń basym bóligin, sonyń ishinde áıel beınesin shetelden kelgen qonaqtar satyp alatyn kórinedi. Sebebi Eýropada Shyǵys áıelderi joǵarǵy deńgeıde baǵalanady eken. Bul bizdińshe sýretkerdiń ózindik qoltańbasy bar ekenin aıǵaqtaıdy. Qazaq áıeliniń obrazyn somdaý arqyly álemdi qyzyqtyrǵan qylqalam sheberiniń eńbegi zor.
