Tirligi taǵylym men tálimge toly halqymyzdyń tanym-túsinigi - ana densaýlyǵyna, áıeldiń bosanýy men bala kútimine qatysty nebir tańǵajaıyp yrym-tyıym men salt-dástúrdiń qazynasy. Áıel tolǵatyp bastaǵandaǵy jarysqazan uıymdastyrý, bosanýdy jeńildetý jáne jyldamdatý úshin arqanǵa asylý syndy áreketter tek salt-dástúr ǵana emes, medısınalyq turǵydan asa mańyzdy jáne orasan paıdaly ádister. Osyny eskergen Mańǵystaýlyq akýsher-gınekologtar Amal merekesinde ózderiniń sátti ıdeıalaryn júzege asyrdy. Ol – zamanaýı quraldarmen tolyqtaı jabdyqtalǵan ulttyq naqyshta bezendirilgen bosaný bólmesiniń ashylýy.
– Bul bólmede zamanaýı úrdis pen qazaqı naqysh úndestirilgen. Bólmede ulttyq mádenıet pen dástúrdiń ustyny – kıeli shańyraq, kıiz úı, onyń ishki dúnıeleri – kıiz úıdiń basqur-baýy, erterekte tolǵaǵy jetken áıel bir shetin keregege, bir shetin baqanǵa baılap asylyp turyp bosanǵan arqan men jalpaq baý jáne oıý-órnekti tystary bar tósek-oryn, sábıin bosanyp qolyna alǵan baqytty ana sýreti men dombyra beınesi bar. Barlyq atrıbýttar júkti áıelge zııan keltirmeıtin materıaldardan jasalǵan, ıaǵnı súrtýge, jýýǵa, zararsyzdandyrýǵa bolady. Barlyq atrıbýtta qazaq halqynyń bolmysy bar. Kórýge, qaraýǵa jaıly, jyly sýretter áıeldiń bosaný kezindegi psıhoemosıonaldyq kóńil-kúıine jaqsy áserin tıgizedi dep úmittenemiz, deıdi ortalyqtyń marketıng boıynsha pasıenttermen jáne qoǵammen baılanys bóliminiń mamany A. Izmuratova.
Onyń aıtýynsha, bosaný bólmesin ulttyq naqyshta bezendirýdiń ózindik sebepteri bar eken. Iаǵnı bosanatyn áıelderdiń deni – ár otbasynyń kelinderi, ıaǵnı jastar bolǵandyqtan bólmeden ultymyzdyń tarıhymen baılanys tapqandaı áser alsyn, dástúrdi tanyp bilsin, sábılerin de ulttyq bolmyspen tárbıeleýge umtylsyn degen nıet.
Merekege oraı qazaqtyń salt-dástúrin dáripteıtin qoıylymdar, kórinister qoıyp, saıystar uıymdastyrǵan ortalyq qyzmetkerleri men dárigerlerdiń ulttyq bolmysty, tarıhty taný, jas urpaq sanasyna ony sińirý baǵytyndaǵy bastamalary qyzyqty. Ony áleýmettik jelilerden habardar bolyp óz qyzyǵýshylyǵyn jasyra almaǵan jas analardyń lebizinen baıqadyq. El-jurt kıeli shańyraq astynda, tekemettiń ústinde týylatyn urpaqtyń ultjandy bolyp ósýine tilekshi.
Mańǵystaý oblysy
