Sońǵy shırek ǵasyrdan astam ýaqyt bederinde qalamgerlerdiń jaǵdaıy kúrt nasharlaı bastady. Kitaptar shyqpady, shyqsa da az mólsherde shyqty. Qalamaqy tólenbedi. Onyń esesine avtordyń ózine satyp alýǵa kitap berildi. Qalamger shyqqan kitabyn alyp, el aralady. Osy jaǵdaı kúni búginge deıin jalǵasyp keledi...
Merzimdi baspasóz betterinde aqyn-jazýshylardyń túrli jazǵandary: ádebı dúnıeleri, maqalalary, ǵylymı zertteýleri, tarıhı eńbekteri jaryq kórip jatty. Biraq sol shyqqan materıaldarǵa da qalamaqy berilmedi. Avtorlar aqshasyz qaldy. Osynyń saldarynan qalamy qarymdy avtorlar jazýyn toqtatty. Esesine kommersııalyq ádebıet beleń aldy. Ádebıetti kórkemdik emes, aqsha bıledi. Kimniń qaltasynda aqshasy bar, sonyń kitaby shyqty. Al jazýshylardyń kóbiniń kezindegi aılyq aqysy tym az bolǵandyqtan, olardyń zeınetaqy qorlaryna da aqsha az aýdaryldy. Mine, osy sebepti alatyn zeınetaqysy da múldem mardymsyz bolyp otyr. Sanatorıı men kýrortqa barý, shetel asý degen jaıyna qaldy.
Buǵan qosa, zeınet jasynan asqan qalamgerlerdiń densaýlyǵy da syn kótermeıdi. Kópshiligi emhananyń esebinde turady. Adamǵa as qanshalyqty qajet bolsa, aýrýshań adamǵa dári-dármek te sonshalyqty kerek. Ony alýǵa kóp jaǵdaıda múmkindigi jete bermeıdi. Jalpy sany jaǵynan olar tym kóp te emes. Solarǵa kómek kórsetýge memleketimizdiń kúsh-qýaty tolyǵymen jetedi. Tek kóńil bólý kerek. Zeınet jasyndaǵylar, ashyǵyn aıtqanda, jar basyna jaqyndap qalǵandar...
Aqyn-jazýshylar atynan tilek bildirýshi –
Dánesh AHMETULY,
Qazaqstan Jazýshylar odaǵynyń múshesi
