Kollajdy jasaǵan Amangeldi Qııas, «EQ»
Qazirgideı kúrdeli kezeńde de Prezıdent elimizdiń bolashaǵyn naqty baǵamdap, Jańa Qazaqstandy azamattyq qoǵamy qalyptasqan tıimdi memleketke aınaldyrýǵa ekpin bere otyryp, barsha qazaqstandyqtarǵa senim syılaǵany sózsiz. Elimizdiń saıası júıesin keshendi jańǵyrtýda jergilikti atqarýshy organdardyń atqarar róli zor. Qýatty aımaqtar – memleket órkendeýiniń negizi. Memleket basshysy azamattyq belsendilikti jandandyrý kerektigin, memleket pen qoǵamnyń sanaly ári syndarly seriktestigine jol ashý qajettigin basa aıtty.
Jambyl oblysynda bul baǵytqa aıryqsha den qoıylýda. Jýyrda ǵana «Qoǵamdyq qabyldaý» toby qurylyp, oǵan qoǵam belsendileri, zııaly qaýym, BAQ ókilderi jáne taǵy basqalar endi. Olar aýdan, aýyldardaǵy jergilikti turǵyndarmen kezdesip, ózekti áleýmettik máselelerdi anyqtap, tıimdi sheshilýine jumys isteýde. Top jumysynyń alǵashqy nátıjeleri kórine bastady. Ásirese, «Qoǵamdyq qabyldaý» toby qańtar oqıǵasynan keıin túsindirý, aqparattyq jumystarmen júıeli túrde aınalysýda. Bul baǵyttaǵy sharalar jalǵasatyn bolady. Bılik pen buqaranyń ózara birlesken áreketi – ózekti máselelerdiń jedel ári tıimdi sheshilýine yqpal etedi.
Joldaýda partııa jumysyn jańǵyrtý, kóppartııaly júıeni qalyptastyrý, partııalarǵa teń jaǵdaıdy qamtamasyz etý – saıası básekelestiktiń artýyna jol ashatyndyǵy aıtyldy. «Ákimder men olardyń orynbasarlaryna partııa fılıaldarynda qyzmet atqarýǵa zań júzinde tyıym salý kerek. Mundaı sheshimder kóppolıarly partııalyq júıeni qalyptastyrýǵa múmkindik beredi», degen Memleket basshysy azamattardyń ókildi bılikke degen senimin nyǵaıtý úshin máslıhattarǵa basa mán berý kerektigin de atap ótti. Prezıdentimiz aıtqandaı, saıası jańǵyrý nátıjeli júzege asýy úshin barshamyz jumyla jumys isteýimiz qajet. Zań – barshaǵa ortaq. Bul rette bılik pen qoǵamnyń birige otyryp, Jańa Qazaqstannyń irgetasy saıası jáne ekonomıkalyq reformalardyń úılesiminde qalanýyna belsendi túrde atsalysýy mańyzdy.
«Bizge eshkim syrttan kelip, eshteńe jasap bermeıtini anyq, bári óz qolymyzda. Sondyqtan barshańyzdy Jańa Qazaqstandy qurýǵa bir kisideı jumylýǵa shaqyramyn. Halyqtyń qoldaýymen maqsatymyzǵa jetemiz dep senemin», dedi Qasym-Jomart Kemeluly. Joldaýda júktelgen basymdyqtardy júzege asyrýda ashyqtyq pen júıelilikti negizge ala otyryp, tıimdi áreket etýge tıispiz. Halyq bizden naqty nátıje kútedi.
Tatýlyq pen turaqtylyq, tynyshtyq pen beıbitshilik sekildi qundylyqtarymyzdy saqtap, ekonomıkamyzdy nyǵaıtyp, turǵyndardyń ál-aýqatyn arttyrý jolynda jumyla jumys isteý – bizdiń negizgi mindetimiz!
Berdibek SAPARBAEV,
Jambyl oblysynyń ákimi
