Astana jaıly ápsana

Qystyń qyzyǵy tarqady. Biraq appaq qarǵa oranǵan Nur-Sultannyń keremet kesh­teri men mamyq ulpany má­pelegen juldyzdy túnderi umytyla qoıa ma eken!? Ásirese bozbala men boıjetkenniń sana­synan óshpesi anyq qoı. Aıdyń jaryǵyna shomylǵan qala turǵyndary dalada qan­sha aıaz bolsa da elordany erekshe jaq­sy kóredi. Kóńilde mekendegen sáýleli kún­derdiń kýá­geri osy shári, yzǵarly bolsa da janǵa ys­tyq, júrekke jaqyn. Muny belgili sýretshi, peızajdyń has sheberi Tóleýǵazy Baı­ǵalıev «Qysqy astana» kartınasynda bekzada boıaýmen jet­kizedi. Kompozısııaǵa qa­rap astanany súıseńiz, osylaı súıińiz degińiz keledi!

Qylqalam sheberi óziniń atalǵan týyndysyn qala peızajy janryna arnaıdy. Qala peızajy – bul zaman tynysyn jetkizýshi, ýaqyttyń boıaýyn anyqtaıtyn syrly kartına. Avtor mereıli mezgildiń bir sátin nemese qurylys, kóshe, saıabaq pen qala kórinisterin sýretshiniń kózimen beınelep ári oqyrmannyń júreginen ótkizýge tyrysqan.

Baıqasańyz sýretshi «Qys­qy astana» kartınasynda eski astananyń kishkentaı ǵana kórinisin beredi. Qalanyń ba­ıyr­ǵy turǵyndary Selıno­grad­tyń eski ortalyǵy sanalatyn SÝM-nan Kongress-Holǵa ótetin jerasty jolynyń aldyn birden tanı qoıady. Kishkentaı saıabaqta úıeńki butaqtary men jas shyrshalar sozylyp jatyr, olardyń arasynan eski úsh qabatty úıler kórinedi. Aspan bultty, joldardy muz basqan, aǵash butaqtary men gúlzarlardy qalyń qar japqan.

Mine, munyń bári sýretshi tústerdi úılestirip jetkizgen qystyń úırenshikti belgileri. Tynyq, kómeski, reńk jaǵynan bir-birine jaqyn túster tabı­ǵattyń kúıi men sol jerdiń atmosferasyn jetkizip tur. Sý­retshi áli de qarańǵylyq tús­pegenin aıtyp, ymyrt uıalar shaqtyń keskinin syzǵan. Qysqy asta­nany saǵynǵan janǵa ańsa­ryn basar ádemi sýret ártúrli oıǵa jeteleıdi.