V.Zelenskıı NATO-dan Ýkraına áýesin qorǵaýdy jáne joıǵysh ushaq berýdi birneshe ret surady. D.Baıden ákimshiligi men zań shyǵarýshylardyń kópshiligi mundaı qadamǵa barǵysy kelmeıtinin bildirdi, sondyqtan V.Zelenskıı amerıkalyqtardyń talap etýin surap otyr. AQSh úkimetiniń mundaı qadamǵa barýy kúmándi. Alaıda Kongress pen Djo Baıden Ýkraınaǵa alystan qarjylaı kómek berip, Reseıge ekonomıkalyq qysym kórsetýmen shekteledi. AQSh prezıdenti ótken aptada bólingen 1 mıllıard dollarǵa qosa, Ýkraına qorǵanysyna taǵy 800 mıllıon dollar qosymsha bóletinin jarııalaýy múmkin.
Ulybrıtanııa premer-mınıstri Borıs Djonson «Ýkraınanyń jaqyn arada NATO-ǵa kirýi múmkin emes» deıdi, biraq bul sheshimdi el prezıdenti qabyldaýy kerek dep basa aıtty. Volodımır Zelenskıı de Ýkraınanyń NATO qataryna qabyldanýy ekitalaı ekenin ashyq bildirdi.
Sońǵy kúnderi Ýkraınada shabýyldan, atys alańynan aqparat taratyp júrgen sheteldik jýrnalısterdiń qaza bolǵany týraly aqparat tarady.
Ýkraına prezıdentiniń keńesshisi Reseıdiń Ýkraınanyń Aýstrııa sekildi beıtarap ustanymdy qabyldaýy kerek degen usynysy qabyl bolmaıtynyn málimdedi. Ekijaqty kelissóz tobynyń múshesi Mıhaıl Podolıak jergilikti BAQ-qa bergen pikirinde kez kelgen beıbit kelisim Ýkraınanyń egemendigin saqtap qalatyn tıimdi shartta jasalýy kerek dep atap ótken.
Eldegi ahýalǵa keler bolsaq, urys toqtaǵan joq, adam shyǵyny bar. Reseı snarıadtary Kıevtegi eki kóp qabatty turǵyn úıge qulap, eki adam jaraqat alǵan. El astanasynda eki kúnge komendanttyq saǵat jarııalanǵandyqtan halyq býnkerlerdi panalaýǵa májbúr. Qala ákimi «bul Kıev úshin asa qıyn ári qaýipti sát» dep sıpattady. Ýkraınanyń tótenshe jaǵdaılar qyzmeti eldiń ekinshi úlken qalasy Harkovta turǵyn úıge túsken snarıadtan eki adamnyń qaza bolǵanyn habarlady. Ýkraına ókilderi sońǵy kúnderi Reseıdiń shabýyly báseńdegenimen, qurbandar sany azaımaǵanyn aıtady. Reseı áskerı-teńiz kúshteri Odessa mańynda Qara teńizde shoǵyrlanyp jatqany habarlandy, alaıda Nıkolaev aınalasyndaǵy kómekshi ásker shegingen. Marıýpoldi 20 myń adam evakýasııalanǵannan keıin qorshaý jalǵasyp jatyr. Eń aýyr shaıqas shyǵysta, Lýgansk mańynda jalǵasyp jatqanǵa uqsaıdy. Ondaǵy Reseı áskerleri Dnepr arqyly batysqa qaraı ońtústiktegi áskermen baılanys ornatýǵa tyrysyp jatyr delingen. Eger bul áreketi sátti aıaqtalsa, Donbastaǵy ýkraın áskeriniń qorshaýda qalý qaýpi bar.
Kelissózderge keler bolsaq, eki tarap ta kelisimge kelýge az bolsa da úmit bar ekenin aıtyp otyr. V.Zelenskıı Reseımen beıbit kelissózder naqtylana bastaǵanyn aıtty. Al Reseıdiń Syrtqy ister mınıstri «ymyraǵa kelýge úmit bar» ekenin, alaıda kelissózder «ońaı júrip jatpaǵanyn» málimdedi. Degenmen kelissóz jalǵasyp jatyr. Ýkraına ókili Mıhaıl Podolıak kelissózder barysynda «túbegeıli qaıshylyqtar» baryn, alaıda «kelisimge oryn baryn» atap ótti.
Osyǵan deıin Polsha, Chehııa jáne Slovenııa premer-mınıstrleri Kıevke jol tartqany aıtylǵan. Olardyń sapardan aman-esen Polshaǵa oralǵany belgili boldy. Úsh el kóshbasshysy osylaısha Ýkraınaǵa qoldaýyn bildirgileri kelgenin aıtqan. Olar – Ýkraınadaǵy urys qımyldary bastalǵaly elge kelgen alǵashqy sheteldik tulǵalar.
NATO-nyń bas hatshysy Iens Stoltenberg Brıýsselde ótken delegattar kezdesýinde qaýipsizdik blogy Ýkraınany biraýyzdan qoldaýdy jalǵastyra beretinin málimdedi. Ol Batys kóshbasshylary Kıevke úlken áskerı qoldaý kórsetkenin jáne bul qoldaýdy jalǵastyrýǵa ýáde bergenin aıtty.
Ýkraınadan Polshaǵa qashqan adamdardyń sany 1,89 mıllıonnan asty. Bul sandy Polshanyń shekara kúzet agenttigi aıtty. Varshava ýnıversıtetiniń kóshi-qon máselesin zertteýshi professory Maseı Dýshchıktiń aıtýynsha, jarty mıllıonnan astam adam elden ketken bolýy múmkin. Shekaradan ótkenderdiń 94 paıyzy Ýkraına azamattary bolǵan.
