Qostanaıdaǵy kóterme saýda oryndarynda qant kóp ekenin jeke dúkeni bar kásipkerler de rastap otyr. Biraq satylmaıdy.
– Osydan eki apta buryn qanttyń kılosyn 400 teńgeden alǵanmyn. Odan keıin búkil apta boıy taba almadym. Keshe barlyq kóterme saýda oryndaryn taǵy sharlap shyqtym, qant joq. Jurttyń aıtýynsha, kóterme saýdamen aınalysatyn kásipkerler bir ózgeristi kútip otyr. Estýimshe, qazir qalada qant satatyn bir-aq núkte bar. Buryn ol jerden 390 teńgeden alatynbyz, búgin 700 teńgeden satyp jatyr eken. Maǵan 25 kılolyq bir qapty 14 myń teńgeden usyndy. Buǵan 20 paıyz ústeme pul qosyp satsam, ony kim alady? Reseı men Belarýsten keletin taýyqtyń san etin de taba almadym, – dedi shaǵyn dúken ustap otyrǵan kásipkerdiń biri.
Aımaq basshysy oblystyń azyq-túlik taýarlaryn turaqtandyrý qoryndaǵy qanttyń taıaý kúnderi jergilikti saýda jelileri arqyly satyla bastaıtynyn málimdedi.
– Saýda jelileri qantty shekteýli túrde satady. Osy arqyly qanttyń aımaqtan tys jerlerge satylyp ketýine jol bermeıtin bolamyz. Sondaı-aq «Azyq-túlik korporasııasy» AQ arqyly jetkizýshiler jaqyn arada taǵy da qant satyp alatyn bolady. Basqa elderden de qant ákelý máselesi qarastyrylýda. Oblysta qant qoryn jetkilikti mólsherde satyp alý úshin qosymsha 850 mln teńge qarajat bólý týraly tapsyrma berdim, – dedi Arhımed Muhambetov.
Oblystyń barlyq aýmaǵynda qant tapshylyǵyn joıý sharalary qolǵa alynyp, qala jáne aýdan ákimdikteri áleýmettik mańyzy bar azyq-túlik taýarlaryna kúndelikti monıtorıng júrgize bastady.
Qostanaı oblysy
