Bıyl atalǵan joǵary oqý ornynda birqatar tyń joba qolǵa alyndy. Qabanbaı batyr atyndaǵy murajaı ashylady. Sportzaly jańartylady, atý tırine kúrdeli jóndeý jumystary júrgiziledi. Sondaı-aq serebraldy sal aýrýyna shaldyqqan balalarǵa arnalǵan otandyq oryndyqtar, qımyl-qozǵalysty damytatyn oıynshyqtar óndirýdi qolǵa alyp otyr.
Murajaı ýnıversıtettiń ekinshi korpýsynda ornalaspaq. Aıta ketsek, dál sol korpýstan ýnıversıtettiń tarıhy bastalǵan. Qazirgi ýaqytta munda elimizdiń Qarýly Kúshteri úshin bolashaq áskerıler daıarlanady. ShQÝ rektory Muhtar Tólegenniń aıtýynsha, murajaı bolashaq ofıserlerge qajetti bilim men tájirıbe alýǵa baǵyttalǵan. Basty maqsat – jastardy áskerı-patrıottyqqa tárbıeleý.
– Ýnıversıtet bazasynda Qabanbaı batyr atyndaǵy murajaıdy ashý jospary talqylandy. Jańa nysandy ashýǵa kómekke mýzeıtanýshylar, sáýletshiler, tarıhshylar men áskerıler keldi. Eskızderdiń ártúrli nusqasyn talqyladyq. Qazirgi zamanǵy sıfrly tehnologııalar qoldanylady. Sondyqtan bul mýzeı tek bizdiń stýdentterge, magıstranttar men doktoranttarǵa ǵana emes, qala turǵyndaryna da qyzmet etedi, – dedi Muhtar Tólegen.
Mýzeı ashylǵan soń ekspozısııalar áserin kúsheıtý úshin jańa zamanaýı tehnologııalar qoldanylmaq. Standartty vıtrınalyq jabdyqtarmen qatar QR-kodtar men aýdıogıdterdi iske qosý josparlanǵan.
Shyǵys Qazaqstan oblysy
