Oblystyq Mádenıet basqarmasynyń uıymdastyrýymen, Erik Asqarov atyndaǵy aıtys mektebiniń jetekshisi Jarqyn Juparhan sııaqty azamattyń belsendiligimen áz – Naýryzdyń qarsańynda ótken bul aıtys Qazaqstannyń halyq jazýshysy, sóz zergeri Ǵabıt Músirepovtiń 120 jyldyǵyna, halyq jazýshysy, dramatýrg, Safýan Shaımerdenovtiń 100 jyldyǵyna jáne aqyn, qoǵam jáne memleket qaıratkeri Kákimbek Salyqovtyń 90 jyldyǵyna arnalyp, «Ultyn súıgen ulylar» dep ataldy.
Aıtysty Qazaqstannyń eńbek sińirgen qaıratkeri, halyqaralyq aıtys aqyndary men jyrshy-termeshiler odaǵynyń tóraǵasy, aqtańger aqyn Júrsin Ermannyń ózi júrgizdi. Qatysqan aqyndar arasynda respýblıkaǵa tanymal úzdikter Rústem Qaıyrtaı, Erkebulan Qaınazar, Qalıjan Bildásh, Meıirbek Sultanhan, Tólegen Jamanov, Tilegen Ádilov, Serik Qýanǵan, Shuǵaıyp Sezimhan, Qaziret Berdihan, Nurzat Qarý, Jumabek Rahımov, Jarqyn Juparhan boldy.
Qazaqstannyń eńbek sińirgen qaıratkeri, halyqaralyq «Alash» ádebı syılyǵynyń laýreaty Ǵalym Jaılybaı tóraǵalyq etken, quramynda Qazaqstan Jazýshylar odaǵy tóraǵasynyń birinshi orynbasary Aqberen Elgezek, «Daryn» memlekettik jastar syılyǵynyń laýreaty, aqyn Dáýletkereı Kápuly, kásipker, rýhanııat janashyry Jomart Omarov, aqyn-sazger Dásten Baımuqanov, Segiz seri atyndaǵy qazaq halyq aspaptar orkestriniń kórkemdik jetekshisi Qaıyrly Ǵafýrov bolǵan qazylar alqasy bas júldeni Jarqyn Juparhannyń alǵanyn biraýyzdan maquldady. Sóıtip Jarqyn sońǵy bir aıda eki respýblıkalyq aıtystyń Bas júldesin qanjyǵasyna baılady. Buǵan deıin ol Taraz qalasynda bolǵan «Jambyl – meniń óz atym, Halyq – meniń shyn atym» atty respýblıkalyq aıtysta da birinshi oryn alǵan edi. Jerlesimizge jeńisteriń qutty bolsyn dep tileımiz!
