AQSh Prezıdenti Djo Baıden óz quttyqtaýynda Memleket basshysyna densaýlyq jáne Qazaqstan halqyna baq-bereke tilegen.
– Beıbitshilik pen jańarýǵa úndeıtin bul kúni Qurama Shtattardaǵy jáne búkil álemdegi kóptegen adam osynaý keremet meıramdy Sizben birge toılaıdy. Qazaqstan men AQSh 30 jyldan beri berik ári turaqty seriktestikke negizdelgen dıplomatııalyq qatynastardy jalǵastyryp keledi. Meniń Ákimshiligim halqyńyzdyń ekonomıkalyq, áleýmettik jáne saıası múmkindikterin qalyptastyrýdy kózdeıtin reformalaryńyzdyń baǵdarlamasyna qoldaý kórsetedi. Naýryz qutty bolsyn! – delingen Djo Baıdenniń jedelhatynda.
О́zbekstan Prezıdenti Shavkat Mırzııoev Naýryz merekesi Ortalyq Azııa halyqtarynyń ortaq maqsaty men armanyn bildiretin meıram ekenin atap ótken.
– Adamzat tarıhynda úlken oryn alatyn osy aıtýly mereke halyqtarymyz ben elderimiz arasyndaǵy dostyq arqaýyn bekemdeýge, yntymaqtastyq pen úılesimdi qatynastardy nyǵaıtýǵa ólsheýsiz úles qosady. Biz eki el arasyndaǵy ózara senim men qurmetke negizdelgen tatý kórshilik baılanystarymyzdy, strategııalyq seriktestigimiz ben odaqtastyq qatynastarymyzdy odan ári keńeıte beretinimiz sózsiz, – delingen quttyqtaý hatta.
Tájikstan Prezıdenti Emomalı Rahmon óz quttyqtaýynda qazirgi kúrdeli áleýmettik-ekonomıkalyq jáne geosaıası jaǵdaıda ózara qurmet pen qoldaýdyń, dostyq pen birliktiń, beıbitshilik pen turaqtylyqtyń, órleý men jasampazdyqtyń bıik maqsattaryna úndeıtin kóktem merekesiniń jalpyadamzattyq qundylyqtarynyń máni arta túsetinin jazǵan.
– Qasterli Naýryz merekesiniń izgi dástúrlerine negizdelgen Tájikstan men Qazaqstan arasyndaǵy dostyq, strategııalyq seriktestik qatynastary halyqtarymyzdyń túpki múddelerine sáıkes aldaǵy ýaqytta da damyp, keńeıe beredi, – dep jazǵan Emomalı Rahmon.
Ázerbaıjan Prezıdenti Ilham Álıevtiń quttyqtaý jedelhatynda Ázerbaıjan men Qazaqstan arasyndaǵy dostyq, tatý kórshilik jáne yntymaqtastyq búginde Naýryz meıramynyń ejelgi dástúrlerin saqtap kele jatqan halyqtarymyzdyń múddesi jolynda odan ári damyp, nyǵaıa túsetinine senim bildirdi.
– О́zimniń jáne ázerbaıjan halqynyń atynan Sizdi jáne halqyńyzdy qasıetti Naýryz meıramymen shyn júrekten quttyqtaımyn. Bul mereke – tabıǵatqa degen sheksiz mahabbat pen úlken qurmettiń belgisi. Myńdaǵan jyldar boıy synaqqa tózip kelgen ómirlik fılosofııanyń nyshany, – delingen quttyqtaý jedelhatta.
Prezıdent Qasym-Jomart Toqaevtyń atyna óz quttyqtaýlaryn Túrki memleketteri uıymynyń bas hatshysy Baǵdat Ámireev, Kavkaz musylmandar basqarmasynyń tóraǵasy, TMD dinaralyq keńesiniń tóraǵalyǵyn qosa atqarýshy sheıh-ýl-ıslam Allahshúkir Pashe-zade, «Shevron» korporasııasy eýrazııalyq bólimshesiniń basqarýshy dırektory Derek Magness, Eýrazııalyq damý bankiniń basqarma tóraǵasy Nıkolaı Podgýzov, Baıqońyr qalasy qalalyq ákimshiliginiń basshysy Konstantın Býsygın jáne basqalary joldady.
Quttyqtaý jedelhattary áli de kelip túsýde.
