Demek qandaı jaǵdaı bolsyn, barlyq másele konstıtýsııalyq quqyqtar prınsıpinde, zań aıasynda sheshilý kerek. Memleket basshysy ókilettiligin asyra paıdalanǵan quqyq qorǵaý qyzmetkerleriniń áreketin aıyptaǵanymen, syn saǵatta el qorǵaǵan polısııa qyzmetkerleri men áskerı qyzmetkerlerdiń erligin eskerip, Otan qorǵaýshylar quqyqtarynyń saqtalýyna erekshe toqtaldy. «Organda qyzmet etetin azamattar da óz baýyrlarymyz. Olar elmen birge ekenin, týǵan halqy úshin qasyq qany qalǵansha kúresetinin dáleldedi. Otan aldyndaǵy antyna adal bolyp, memleketimizdi janqııarlyqpen qorǵady. Men syn saǵatta qaterge qaımyqpaı qarsy turǵan tártip saqshylaryna rızashylyq bildiremin», dedi Prezıdent.
Aıtyp ótý kerek, Ulttyq ulan jaýyngerleri Qasiretti qańtar oqıǵasy kezinde elimizdiń konstıtýsııalyq qurylymyn, turaqtylyǵy men tynyshtyǵyn qorǵady, azamattardyń zańdy quqyqtaryn qamtamasyz etýge atsalysty. Almaty, Shymkent qalalarynda jáne basqa da oblys ortalyqtarynda quqyqtyq tártipti qamtamasyz etýde buzaqy toppen qarsylasýdyń nátıjesinde, jaraqat alǵan Ulttyq ulan áskerı qyzmetshileriniń sany 400-ge jetti. Budan bólek, jappaı tártipsizdik kezinde Ulttyq ulannyń 90-nan asa áskerı tehnıkasy zardap shekti. Nátıjesinde, el basshylyǵy da, quqyqtyq tártip áskeri de úlken «kúshke» qarsy turdy.
«Sońǵy jyldary biz Qazaqstandy túbegeıli jańǵyrtýǵa, transformasııalaýǵa kóshtik. Túrli salada aýqymdy ózgerister bastaldy. Bul keıbir yqpaldy adamdarǵa unamady. Olar jyldar boıǵy zańsyz áreketterin odan ári jalǵastyra berýdi kózdedi. Neǵurlym joǵary bılikke ıe bolýdy kóksedi. Sol úshin kánigi qylmyskerler, qarýly zańsyz uıymdar men opasyz sheneýnikter birigip, astyrtyn top qurdy», dedi Memleket basshysy. Prezıdenttiń tóńkeris uıymdastyrýshylardy osylaı sıpattaýynan quzyrly organdar men ásker qandaı alpaýyt qaýip-qatermen betpe-bet kelgenin túsinýge bolady.
Sondaı-aq «Ishki jáne syrtqy jaýlarymyz ózara ymyralasyp, bılikti basyp alǵysy keldi. Olar halyqtyń narazylyq sherýin basqa arnaǵa buryp, jurtty qasaqana arandatty. Lańkester memlekettik organdarǵa, strategııalyq nysandar men bızneske tıesili ǵımarattarǵa shabýyl jasady. Bılikke kúıe jaǵý úshin beıbit turǵyndarǵa oq atty», dedi el Prezıdenti.
Bir aıtarym, ulandyq jaýyngerler ózderiniń mindetterine, bergen Áskerı anttaryna adal boldy. «Buıryqtyń aty – buıryq» dep búlikshilerge jol bermegen ofıser Ulan Myrzabaev ta, jas ómirlerin beıbit ómir jolynda qıǵan qatardaǵy Madııar Qaısarov pen Aıbat Amanov ta óz erlikterimen «Ár túrli kózqaras – birtutas ult» qaǵıdatyn berik ustanýǵa tıis bolashaq Jańa Qazaqstannyń irgetasyn qalady. Biz ótkennen sabaq alyp, búkil el bolyp, táýelsizdiktiń qadir-qasıetin jan-júregimizben sezinýge, tatýlyq pen turaqtylyq, tynyshtyq pen beıbitshilik qanshalyqty mańyzdy ekenin jete túsinýge tıispiz. Qazaqstan Prezıdenti aıtqandaı: «Qazir saıası barrıkadalar ornatyp, ár máselege bola mıtıng ótkizetin, kúmándi sheshimderge ıtermelep, jónsiz talap qoıatyn, mindetin oryndap júrgen polısııa qyzmetkerleriniń jaǵasyna jarmasatyn ýaqyt emes». Qazir táýelsizdigimiz ben konstıtýsııalyq qurylymymyzdy nyǵaıtatyn ýaqyt.
Qarýly Kúshterimizdiń Joǵarǵy Bas Qolbasshysy Qasym-Jomart Kemeluly Toqaev elordalyq jedel brıgadaǵa barǵan alǵash saparynda Ulttyq ulanǵa «Naǵyz erlik pen patrıotızm mektebi» degen baǵa bergen bolatyn. О́z kezeginde Ulttyq ulan áskeri máńgi saqshy ispetti ózine júktelgen mindetterge saı quqyqtyq tártipti ári qaraı da qamtamasyz etetinine sendirgim keledi.
Álibek SERÁLIEV,
general-maıor,
Qazaqstan Respýblıkasy Ulttyq ulany Bas qolbasshysynyń tárbıe jáne áleýmettik-quqyqtyq jumystar jónindegi orynbasary
