Infografıkany jasaǵan Amangeldi Qııas, «EQ»
Memleket bul sheshimdi qabyldar aldynda azamattardyń naqty usynys-tilekterin muqııat zerdelegenin aıtty. Kópten beri halyqtyń oıynda júrgen, ár jerde aıtylyp, oryndalýy sozylyp kele jatqan Semeı men Jezqazǵan óńirin túletý bastamasy el-jurttyń kókeıinen shyqty desek te bolady.
«Eń aldymen, Semeı aımaǵynda Abaı oblysyn qurýdy usynamyn. Semeı qalasy jańa oblystyń ortalyǵy bolady. Osy máseleni aımaq turǵyndary kópten beri aıtyp júrgenin bilemin. Qazir ol jaqta sheshimin tappaǵan túıtkilder az emes. Mysaly, aımaqtyń ishki ınfraqurylymy ábden tozǵan. Kezinde Alash arystarynyń basyn qosqan Semeı qalasynyń jaǵdaıy da máz emes. Biz tarıhı ádildikti ornatyp, ulylarymyz dúnıege kelgen kıeli ólkeni qaıta jańǵyrtýǵa tıispiz», dedi Prezıdent.
Biz budan neni ańǵaramyz? Abaı oblysyn qurý – Alash rýhyn asqaqtatý! Táýelsizdik jolynda azattyq besigi bolǵan óńirdi qaıta túletýdiń rýhanı mańyzy óte joǵary. Bul Abaı jolymen júrý degen sóz. Alash azamattary orda tikken oryndy jandandyrý!
Memleket basshysy «Burynǵy Jezqazǵan oblysynyń aýmaǵynda Ulytaý oblysyn qurý qajet. Jezqazǵan qalasy qaıtadan oblys ortalyǵy bolady. Bul aımaqta derbes oblys qurý – ekonomıkalyq qana emes, rýhanı jaǵynan da mańyzdy sheshim. Keń-baıtaq qazaq jeriniń dál júreginde ornalasqan Ulytaýdyń tól tarıhymyzdaǵy orny erekshe. El taǵdyry sheshilgen uly jıyndar osynda ótken. Saryarqanyń tórinde ornalasqan bul aımaqtyń týrıstik áleýeti óte zor. Onyń óndiristik qýatyn, logıstıkalyq múmkindigin utymdy paıdalaný kerek.
Bir sózben aıtqanda, biz Ulytaý aımaǵynyń damýyna jol ashamyz», dep taǵy bir tyń bastama kóterdi.
Bul neniń belgisi? Biz «Ulyq ulys» dep atap júrgen Joshy hannyń ıeligindegi qazirgi qazaq jeriniń tarıhy tym tereń. Memlekettilik bastaýy bolǵan óńir. «Buryn memleket bolmaǵan» dep júrgenderge dıplomatııa tilimen berilgen salmaqty jaýap.
Qazaqtyń ishki aımaqtary talaı jyldan beri nazardan qaǵys qalyp keldi. Sonyń saldarynan áleýmettik problemalary da qordalanyp qaldy. Endigi tańda Qazaqstandaǵy ýrbanızasııa, ishki kóshi-qon saıasatynda aıtarlyqtaı ózgerister bolady. Úlken qalalarǵa qaraı aǵylǵan jurttyń legi tolas tabady. Ár óńir qýatty aımaqqa aınala bastaıdy. «Qýatty Qazaqstan» jobasy osyndaı irgeli ózgerister arqyly júzege asady dep senemiz!
Prezıdent Qasym-Jomart Toqaev óz Joldaýynda qazaqtyń «Keńesip pishken ton kelte bolmas» degen naqyl sózin keltirdi. Babalarymyz el taǵdyryn aıqyndaıtyn tarıhı sheshimderdi búkil halyq bolyp aqyldasyp, birge qabyldaǵan deı kelip:
«Ulytaýda, Ordabasy men Kúltóbede ótken uly basqosýlar – sonyń aıqyn dáleli. Keleli jıynda aıtylǵan kesimdi sózge alty Alashtyń balasy túgel toqtaǵan. Biz birliktiń bastaýy bolǵan osy dala demokratııasynyń dástúrin jańǵyrtýymyz kerek», deıdi.
Prezıdent nege «Dala demokratııasy» dep otyr? Bul Qazaq eliniń memlekettiligin aıǵaqtaıtyn dálel. Kez kelgen eldik, memlekettik másele halyqtyń qatysýymen sheshilgen. Prezıdent Ulttyq qoǵamdyq senim keńesin qurǵan bolatyn. Bul qurylym óz mindetin tabysty atqardy. Endi onyń ornyna quramy jaǵynan aýqymdy Ulttyq quryltaı qurý usynyldy. «Jańa qurylym Ulttyq keńestiń qyzmetin jalpyhalyqtyq deńgeıde jalǵastyrady. Quryltaı qoǵamdyq dıalogtyń birtutas ınstıtýsıonaldyq modelin qalyptastyrýǵa tıis. Sóıtip, bılik pen halyqtyń arasyndaǵy dánekerge aınalady.
Qazirgi Qoǵamdyq keńesterdiń bárin óz aınalasyna toptastyrady. Ulttyq quryltaıdyń quramynda elimizdegi barlyq aımaqtyń ókilderi bolady. Sondaı-aq oǵan Parlamenttiń birqatar depýtaty, Qazaqstan halqy Assambleıasy men Azamattyq alıanstyń, qoǵamdyq keńester men uıymdardyń músheleri, bedeldi qoǵam qaıratkerleri, óndiris jáne aýyl sharýashylyǵy jumysshylary, bıznes ókilderi jáne taǵy basqa azamattar kiredi.
Osylaısha, san túrli qoǵamdyq pikir ıelerin túgel qamtıtyn ókildi qurylym qalyptasady. Ulttyq quryltaı músheleri mańyzdy máselelerdi talqylaý úshin turaqty túrde bas qosyp otyrady», dedi Memleket basshysy.
Sonaý Shyńǵystan bastaý alyp, Joshy han ulysynda ornyqqan Ulttyq quryltaı osylaısha Jańa Qazaqstan keńistiginde óz ornyn tapqaly tur!
Nurtóre JÚSIP,
Parlament Senatynyń depýtaty
