El boldyq, ketken esemiz qaıtty dep júrgen kezde bul qasiret memleketimizge qater bolyp jabysypty. Babalar árýaǵy jar bolǵan shyǵar, ol qasiretten qutylyp otyrmyz. Eldiń irgesiniń bútindigin, shyǵar tútinniń túzýligin qý dúnıeniń jolyna baılap, urpaq aldynda kúnáǵa batý qandaı qasiret qamyty edi. Endigi jerde eldigimizden basqa qundylyǵymyzdyń joq ekenin túsindik. О́zimiz ǵana túsinip qoımaı, urpaqtyń da sanasyna sińiretin sát týyp otyr.
Joldaýda Prezıdent «Men Qazaqstan halqynyń erteńi emes, búgin baqytty bolǵanyn qalaımyn» dedi. Bul aqıqat sóz. Dál búgingi isti atqarý eń tıimdi sharýa ekeni sózsiz. Sol sekildi Joldaýda sheksiz bılikti azaıtyp, Parlamenttiń bedelin kóterý týraly oı kóńilge qondy. Mundaı sóz buryn da aıtylǵan. Biraq ol oryndalmady. Ata Zańǵa da biraz ózgerister engiziledi eken. Bul kókeıdegi kóp úmitti oıatty. Úsh oblys qaıta qurylady, bul da arǵy-bergi «shapqynshylyqtan» qutqarary anyq. Ákim qaralar burynǵydaı ákimdik qyzmet pen partııanyń jumysyn da qatar atqara almaıdy. Tek óz sharýasyn tııanaqtaýy tıis. Partııa sózi degen jalǵandyqtan arylady.
Prezıdent Q.Toqaev «Kúmándi kórsetkishke aldanbaımyz» dedi. Bul degeniń ár isti kózben kórip, qolmen ustaýdy talap etedi. Eń bastysy, halyqtyń júıkesin juqartqan jalǵandyq emes, ótirik kórsetkishter, bıýrokratııanyń joly kesiledi degendi bildiredi. Osyndaı talap ár mekemeniń mańdaıshasynda, ár basshynyń jelkesinde tursa, Prezıdent aıtqan kúmándi kórsetkishter oryn almaıtyny haq. Bir sózben aıtqanda, Joldaýdy dúrildetip qoldaýmen emes, tapsyrmany oryndaýmen iske asyrsaq jurttyń sońǵy senimi oıanyp, budan keıingi jerde úmiti úkileı beretini sózsiz. Sonda ǵana jańa Qazaqstannyń jarqyn jumysy, aqıqat isi kórinip, halqymyz osylaı ómir súrýimiz kerek eken ǵoı deıtini aıdaı aqıqat.
Súleımen MÁMET,
jazýshy-jýrnalıst
