Atalǵan jarystyń tusaýy 1985 jyly Fransııanyń astanasy – Parıjde kesildi. Keńes Odaǵy ydyraǵanǵa deıin tórt álem chempıonaty uıymdastyryldy. Sonyń úsheýinde jalpy esepte KSRO quramasy jeke-dara kósh bastady. Sol komandanyń sapynda óner kórsetken qazaqstandyq Grıgorıı Egorov 1989 jyly Býdapeshtte kúmis medalddi ıelendi. Olımpııa oıyndarynyń qola júldegeri degen ataǵy bar Shymkenttiń syryqpen sekirýshisi 5 metr 80 santımetrlik nátıje kórsetti. Bas júlde tashkenttik Radıon Gataýllınge buıyrdy. Ol otandasymyzdan bes santımetrge bıik sekirdi. Qola medaldi amerıkalyq Djo Daıpal enshiledi.
1993 jyly dál sol Egorov táýelsiz Qazaqstanǵa jabyq ǵımarattaǵy álem chempıonatynyń alǵashqy júldesin áperdi. Kanadanyń Toronto qalasynda jalaýy jelbiregen jarysta da ol tek óziniń syralǵy qarsylasy Gataýllınnen oza almady. Úshinshi satyǵa fransııalyq Jan Galfıon taban tiredi.
1995 jylǵy dodany Ispanııanyń Barselonasy qabyldady. «Palaý Sant Jordı» stadıonynda ótken jarysta almatylyq Igor Potapovıch kúmis medaldi moınynda jarqyratty. Jerlesimiz Ýkraınanyń dańqty sportshysy Sergeı Býbkany ǵana alǵa jiberdi. Taǵy bir kúmisti Olga Shıshıgına ıelendi. 60 metrge kedergiler arqyly júgirgen ol kýbalyq Alıýska Lopespen márege birdeı jetti. Desek te qosymsha kórsetkishter boıynsha Bostandyq aralynan kelgen jelaıaqtyń joly boldy.
1997 jyly Parıjde Potapovıchke teń keler eshkim tabylmady. 5 metr 90 santımetrlik nátıjemen ol ózge qarsylastarynan qara úzip ketti. Ekinshi jáne úshinshi oryndardy amerıkalyq Lorens Djonson men reseılik Maksım Tarasov enshiledi. 1999 jyly Japonııanyń Maebası qalasynda Shıshıgına shashasyna shań juqtyrmady. Almatylyq arý belgilengen mejeni 7.86 sekýndta júgirip ótti. Nıgerııalyq Glorııa Alozı kúmispen kúptelse, kanadalyq Ketýra Anderson qolaǵa qol sozdy.
Sodan keıin Lıssabon, Bırmıngem, Býdapesht jáne Máskeý qalalarynda uıymdastyrylǵan jarystardan qorjynymyz bos qaıtsa, 2008 jyly Ispanııanyń Valensııasynda Dmıtrıı Karpov úshinshi orynǵa taban tiredi. 6 131 upaı jıǵan karaǵandylyq jetisaıysshy amerıkalyq Braın Kleı men belorýssııalyq Andreı Kravchenkodan qalyp qoıdy. Pıreneı túbeginde úsh qarǵyp serkirýshi Olga Rypakova da oljaǵa keneldi. Ol qola medaldi moınyna ildi. Sál keıinirek Shyǵys Qazaqstan oblysynyń ókili taǵy eki ret úzdikter sanatynan kórindi. Rypakova 2010 jyly Dohada altynnan alqa taqsa, 2012 jyly Ystanbulda kúmis medaldi qanaǵat tutty.
2014 jyly Sopot, 2016 jyly Portlend jáne 2018 jyly Bırmıngemdegi básekede Qazaqstannyń birneshe sportshysy baq synaǵanymen, olardyń eshbiriniń baǵy janbady. 2020 jyly Nanjınde shymyldyǵy túrilýge tıis dúbirli doda kúlli álemdi jaılaǵan koronavırýstyń kesirinen ótpeı qaldy. Mine, endi araǵa týra 10 jyl salyp, 24 jastaǵy Semeıdiń sulýy Nadejda Dýbovıskaıa óreli ónerimen óz jankúıerlerin qýantty.
Serbııada aıaqtalǵan álem chempıonatynyń jalpy komandalyq esebinde 4 altyn, 3 kúmis jáne 2 qolany oljalaǵan Efıopııa quramasy aldyna jan salmady. Osylaısha, qara qurlyq ókilderi alǵash ret osyndaı orasan zor tabysqa qol jetkizdi. Ekinshi orynda – AQSh. Amerıkalyq órender 3 altyn, 7 kúmis jáne 9 qolany ıelendi. Úshinshi satyǵa Belgııa jaıǵasty. Olardyń qorjynynda qos altyn medal bar. Úzdik bestikti Shveısarııa (1+2+0) men Shvesııa (1+1+1) túıindedi. Atalǵan jarysta 20 memlekettiń ánurany shyrqalyp, barlyǵy 31 eldiń týy bıikte jelbiredi.
