Asa qurmetti
Qasym-Jomart Kemeluly!
Kıeli Ulytaý-Jezqazǵan aımaǵynyń jurty orny aıryqsha qýanyshqa kenelip otyr. Qala-aýdan mekemeleri men mádenı oryndaryna kópshilik jınalyp, Sizdiń Joldaýyńyzdy tyńdady. Keshe ǵana bultsyz kúni kúrkiregen kúndeı bop, el ishin dúrbeleńge salǵan, beıbit sherýdi bereke qashyrǵan qandy oqıǵaǵa aınaldyrǵan lańkesterdiń qastandyǵy men onyń sabaqtary jaıly aıtqan oılaryńyz bizdi erekshe tolǵandyrdy. О́zińiz aıtqandaı, sol kúnderde otyz jyldyq tarıhy bar táýelsizdigimizdiń ornyn sıpap qalardaı syn saǵat týdy.
«Qasiretti qańtar» atanǵan sol dúrbeleńdi basýda Siz tabandylyq, qaısarlyq, sheshimdi qımyl tanyttyńyz. Qandaı qıyndyq bolsa da Siz ózińizdi halyqpen birge bolatyn Memleket basshysy retinde kórsettińiz. Osy adaldyǵyńyz ben ar aldyndaǵy ustanymyńyz úshin biz sizdi erekshe qurmetteımiz.
El men el tizginin ustaǵan Sizdiń aldyńyzda kúrdeli de qıyn mindetter turǵanyn sezemiz. Ol – álem jurtyn alańǵa salyp otyrǵan Reseı-Ýkraına shıelenisi, jahandy janalqymnan alǵan indet saldary, sanksııa zardaptary, ishten shalýdy kóksegen dushpandar áreketi qabat kelip turǵan myna kúrdeli ýaqyttyń syn-qaterinen Qazaqstan memleketin aman-saý alyp shyǵý mindeti. Biz Sizdiń ómirlik tájirıbeńiz ben bilimińizge, tabandylyǵyńyz ben ultqa degen adaldyǵyńyzǵa bek senemiz. Sondaı-aq bul tyǵyryqtan da jol taýyp eldi aman alyp shyǵýǵa kúsh-qýatyńyzdyń jetetinine zor senimmen qaraımyz. Joldaýda aıtqan oılaryńyz ben el áleýetin arttyrýǵa, saıası jańǵyrýǵa qatysty bergen tapsyrmalaryńyz – jurt asyǵa kútken sheshimder.
Qurmetti Qasym-Jomart Kemeluly! Siz Memleket basshysy retinde Ulytaý-Jezqazǵan jerine eki márte jumys saparymen keldińiz. Sol eki saparyńyz da Ulytaý aımaǵy jurtyna sony serpilis ákeldi. «Ulytaý-2019» halyqaralyq forýmy men «Joshy han» tarıhı-mádenı kesheni – sonyń naqty dáleli. Ulytaý jerinde ótken halyqaralyq forýmda Siz: «Ulytaý topyraǵy – alyp tulǵalardyń rýhy toǵysqan jer», dep ult uıasy atanǵan jerge, onyń tarıhı ornyna zor baǵa bergen bolatynsyz. Joldaýyńyzdaǵy «Ulytaý oblysy ashylyp, onyń ortalyǵy Jezqazǵan qalasy bolady» degen sózińiz Ulytaý topyraǵynda toǵysqan alyp tarıhı tulǵalar rýhyna jasaǵan perzenttik, azamattyq taǵzymyńyz boldy.
Shırek ǵasyrǵa jýyq ýaqyt ishinde óndiristi qala Jezqazǵannyń da, Ulytaý aýdanynyń da óńi ketip, ózegi tala bastap edi. Endi bul aımaq qaıta túleý kezeńin bastaıdy. Saryarqanyń osy pushpaǵyn jaılaǵan qalyń jurt, óndiris eńbekkerleri, ardagerler men jastar Sizge osy sheshimińiz úshin shyn júrekten raqmetin aıtyp, alǵysyn jetkizedi.
Súıinshi habar jer jánnaty Jetisý halqyn da, uly Abaı elin de, qasıetti Qapshaǵaı jurtyn da, qaıratker aǵa D.A.Qonaev esimin qadir tutqan eldi de erekshe qýantty. Biz bul qýanyshty kúndi Jańa Qazaqstannyń jaqsy kúnderiniń bastaýy dep sanaımyz.
Eldiń búgini men bolashaǵy úshin qam jasaǵan isińizge sáttilik tileımiz.
Biz Sizben birgemiz, jańa bastamalaryńyzdyń bel ortasynda bolamyz.
Zor alǵyspen,
«Kazakhmys Holding (Kazahmys Holdıng)» JShS eńbekkerleri jáne Ulytaý-Jezqazǵan aımaǵynyń jurtshylyǵy
(11 myńnan astam adam qol qoıǵan)
