Halyq qoldaıtyn myqty bılik kerek

«Aldymen ekonomıka, sosyn saıasat» degen qaǵıda qoǵamdyq júıeni demokratııalandyrýǵa alyp keledi, bul faktor el men jerdiń, memlekettiń baılyǵyn halyqqa qoljetimdi bolýyna jol ashady dep úmittendik. Biraq úmit aqtalmady: qoǵam baılar men kedeıler dep atalatyn eki jikke bólindi. Bul faktor áleýmettik ádiletsizdik pen teńsizdikti týdyryp qana qoımaı, ekonomıkanyń turaqty damýyn tejedi.

Memleket basshysy Jańa Qazaqstannyń qurylysyn onyń saıa­sı negizin qaıta qurýdan bastaýǵa nıettenip otyr. Birinshiden, sýperprezıdenttik basqarý túrinen kúshti Parlamenti bar prezıdenttik respýblıkaǵa ótip jatqanymyzdy atap ótken jón. Bul bılik ınstıtýty men eldiń turaqty damýy ara­syndaǵy ońtaıly teńgerimdi qalyp­tastyrady. Mundaı saıası júıe Qazaqstanda jeke basyna tabynýshylyqa, favorıtızm men bıliktiń bir qolǵa shoǵyrlanýyna jol bermeıdi dep oılaımyn.

Endi Májilis depýtattary jar­tylaı majorıtarlyq negizde saılaý­shylardyń tikeleı daýys berýi arqyly saılanatyn bola­dy. Par­tııalyq tizim boıyn­sha depýtattardy usynýǵa kele­tin bolsaq, bul jerde de prog­res­sıvti demokratııalyq ózgeris­terge basymdyq berilmek. Nátı­je­sinde, saıası partııalardy tirkeý aıtar­lyqtaı jeńildetilip, partııanyń saılaýdaǵy jeńisi tek básekemen anyqtalady.

Memleket basshysynyń partııa­dan shyǵý týraly sheshimin durys dep qabyldadym. Endigi jerde bul faktor partııalyq júıeni qalyp­tastyrýda ashyq báse­keles­tikke kepildik beredi. Ákimder men olardyń orynbasarlarynyń par­tııa fılıaldarynda qyzmet atqa­rýyna tyıym salýdy zańmen bekitý prınsıpti mańyzdy dep sanaı­myn. Senat jumysyn ishteı bile­tin senator retinde men úshin Mem­leket basshysynyń qos palataly Parlamentti nelikten qoldaǵany túsinikti.

Sebebi Parlamenttiń jumys nátıjesi depýtattardyń sanynda emes, olardyń jumysynyń sapasymen ólshenedi. Atqarýshy bılik jumysyndaǵy basty másele el bıýdjetindegi qarajattyń jetis­peýshiliginde emes, onyń tıim­di jumsalýymen anyqtalady. Qara­paıym tilmen aıtqanda, árbir depýtat Úkimet jumysynyń osal tus­taryn aıtyp, ekonomıkany tıimdi basqarýdy talap etse, ómirimiz áldeqaıda jaqsarar edi.

Meniń oıymsha, Prezıdent dál osyndaı qoǵamǵa qajetti yq­paldy Parlamenttiń qalyptasýyna qajetti irgetas jasap jatyr. Qańtar qasireti saıası tu­raq­tylyq­tyń, memlekettiń birtutas­tyly­ǵynyń qadirin jańa sıpatta uqtyryp ketti. Kórshi elderdegi saıası turaqsyzdyq, sanksııalar soǵysy jekelegen elderde ǵana emes, jalpy Jer sharyndaǵy saıa­sı turaqtylyqqa qater tóndirip tur. Bizge qazir memle­ket­tili­gi­mizdiń birtu­tastyǵyn kózi­mizdiń qara­shyǵyndaı qorǵaıtyn sát keldi. Sondyqtan memleketimiz­di, qorǵanys qabiletimizdi nyǵaı­týymyz úshin halyq qoldaıtyn myqty bılik kerek.

Iá, búginde Memleket basshy­sy elimizdiń ekonomıkalyq-áleý­mettik damýynyń naqty baǵdar­lamasyn usyndy. Biraq ony azamattyq qoǵamdy jańǵyrtýsyz tolyq júzege asyrý múmkin emes. Damyǵan elderdiń árbir azamaty demokratııalyq damý ınstıtýttary arqyly memlekettik basqarýǵa atsalysady. Qazir Memleket basshysy Qasym-Jomart Toqaev úshin halyqtyń qoldaýy men senimi mańyzdy ekenin dıvan batyrlary deńgeıinde emes, saıası belsendiligimiz arqyly qoldaýdyń kezi kelgenin árbirimiz túsinýimiz kerek. Halyqtyń senimi endi bas­talǵan ózgeristerdiń baıandy bolýy úshin, ishki-syrtqy kúshterdiń kedergi bolmaýy úshin qajet ekenin Qańtar oqıǵasy kórsetti.

Aqylbek KÚRIShBAEV,

Parlament Senatynyń depýtaty