Qaıyrymdylyq aksııasyna aımaq basshysy Arhımed Muhambetov te atsalysyp, «Altyn alqa» ıegeri Janat Shákirova men kópbalaly ana Anna Pınejskaıanyń úıine kirip shyqty. Ákim kópbalaly analardy Ulystyń uly kúnimen quttyqtap, un, qant, kúnbaǵys maıy, shaı, jarma, makaron sııaqty áleýmettik mańyzy bar azyq-túlik túrleri men balalarǵa tańsyq tátti ónim toly Naýryz qorjynyn tabys etti.
– Jalǵyz ózim bes bala tárbıelep otyrmyn. Ortanshy ulymnyń múgedektigi bar. Jaǵdaıymyz jaman emes, balalardyń turaqty áleýmettik járdemaqysy bar. Onyń syrtynda, aı saıyn tegin azyq-túlik sebetterin alyp otyramyz. Shynymdy aıtsam, memleket balalaryma áke ornyna áke bolyp otyr. Áıteýir, qamqorlyǵyn aıamaıdy. Mine, búgin úıimizge aımaq basshysynyń ózi kelip, balalarym táttige qaryq bolyp, qýanyp máre-sáre bolyp qaldy. Byltyr qala ákimi kelip edi, bıyl oblys ákimi keldi. Balalarym Naýryz jaqyndaǵanda ákem qashan keledi dep emes, ákim qashan keledi dep suraıdy. Oǵan da shúkir. Bárińizdi Naýryz merekesimen quttyqtaımyn!, – dedi Anna Pınejskaıa.
Qaıyrymdylyq sharasyna Amanat partııasynyń ókilderi de qatysýda. Partııanyń «Baqytty otbasy» jobasy aıasynda jergilikti kásipkerler óńirdegi muqtaj otbasylardyń úı-jaıyn jóndep berý, kómir jáne aǵash otynmen qamtamasyz etý, kommýnaldyq qyzmet aqysyn tóleı almaı otyrǵan boryshkerlerdiń qaryzyn óteý, gaz qubyryna qaýipsizdik qurylǵysyn ornatý sııaqty ıgi amaldardy qolǵa alyp jatyr.
Qostanaı oblysy
