Atalǵan jıynda eńbek ujymy Joldaýdyń eń mańyzdy tustaryna toqtaldy. Sonyń ishinde sýperprezıdenttik basqarý úlgisinen aryla otyryp, Parlamenttiń rólin kúsheıtý jáne Memleket basshysynyń jaqyn týystaryna saıası laýazymdardy atqarýǵa, sondaı-aq kvazımemlekettik sektordyń kompanııalaryn basqarýǵa zań negizinde tyıym salý týraly bastamalarǵa belsendi qoldaý kórsetti.
Bul rette «Ulttyq ǵylymı medısınalyq ortalyǵy» AQ basqarma tóraǵasy Abaı Baıgenjın Parlament saılaýyn proporsıonaldy júıemen ótkizýden bas tartý qoǵam úshin kópten kútken qadam bolǵanyn atap ótti. Dárigerlerdiń pikirinshe, partııalardy tirkeý rásiminiń aıtarlyqtaı jeńildeýimen qatar, aýdandyq jáne qalalyq máslıhattar depýtattarynyń majorıtarlyq tásilmen saılanýy saıasatqa halyqtyń senimine ıe bolǵan jańa adamdardyń kelýine yqpal etetini sózsiz. Ekinshi jaǵynan, bul depýtattardyń saılaýshylar aldyndaǵy jaýapkershiligin arttyrady. Jańa partııalar depýtattyq mandattar úshin saıası básekelestikti kúsheıtedi jáne kósheler men alańdardaǵy pikirtalastardyń Parlament pen máslıhattarda kórinis tabýyna múmkindik beredi.
– Bizdiń ortalyq 20 jyldan asa ýaqyt boıy elimizdiń túkpir-túkpirinen kelgen pasıentterge joǵary tehnologııalyq medısınalyq kómek kórsetip keledi. Biz aımaqtardaǵy densaýlyq saqtaý júıesiniń birdeı damyp jatpaǵanynan habardarmyz. Osy oraıda medısına qyzmetkerleri Qazaqstannyń ákimshilik-aýmaqtyq qurylymyn ózgertýge qatysty, Prezıdent bastamasyn tolyq qoldaıdy. Jańa úsh oblystyń paıda bolýy óńirlerdiń damýyna eleýli serpin beredi, turǵyndardyń oblys ortalyǵyna barys-kelisin jeńildetedi, ishki kóshi-qondy retteýdi ońtaılandyrady. Usynylǵan jańa oblystar ataýy – Abaı, Ulytaý, Jetisý oblystary ár qazaqstandyq úshin erekshe qasıetti maǵynaǵa ıe. Negizgi geografııalyq ataýlardy qaıtarý, ult qaıratkerleriniń esimin ulyqtaý rýhanııatymyzdy kúsheıtýge yqpal etetini sózsiz, – dedi A.Baıgenjın.
