Sammıtte NATO-nyń Shyǵys Eýropadaǵy uzaq merzimdi ustanymy baǵalanady. Sársenbiden bastap Brıýsselde memleket jáne úkimet basshylary ekijaqty kezdesýler ótkizdi. Sammıtten keıin de NATO shtab-páterinde ekijaqty kezdesýler jalǵaspaq.
Sammıt bastalmas buryn NATO bas hatshysy Iens Stoltenberg jıynda Ýkraınaǵa qatysty sheshimder qabyldanatynyn, sondaı-aq alıanstyń tejeý kúshin arttyrý sharalary kelisiletinin aıtqan-dy.
«Biz bul daǵdarysty birge sheshemiz. Ýkraınaǵa, NATO-ǵa jáne búkil halyqaralyq erejelerge tóngen qaýippen kúresemiz. Memleketter basshylary Ýkraınaǵa qoldaý kórsetý máselesin talqylaıdy. Odaq Ýkraınaǵa birneshe jyldan beri qoldaý kórsetip keledi. Biz Ýkraınanyń ózin-ózi qorǵaý quqyǵyn saqtaýyna kómektesý maqsatynda áskerı, qarjylyq jáne gýmanıtarlyq qoldaý kórsetýdi kúsheıttik», dedi I.Stoltenberg.
Sondaı-aq ol Bolgarııa, Rýmynııa, Majarstan jáne Slovakııada alıanstyń áskeri kóbirek ornalasatynyn da atap ótti. Osyǵan baılanysty qorǵanys salasyna kóbirek ınvestısııa jasalatynyn jetkizdi.
Sammıt ashylǵannan keıin NATO bas hatshysy Iens Stoltenberg sóz sóılep, jıynnyń qaýipsizdik maqsatynda ótip otyrǵanyn habarlady. Sonymen qatar Kremldiń negizsiz agressııasyn aıyptaıtynyn jetkizdi.
«Biz Ýkraınanyń egemendigi men aýmaqtyq tutastyǵyn qoldaımyz. Osy surapyl atysty aıaqtaý úshin Reseıge shyǵyn keltirý is-qımylyn jalǵastyramyz. Ýkraın halqynyń jáne Ýkraına qarýly kúshteriniń óz quqyqtary men bostandyqtary úshin kúresý jolyndaǵy asqan erligine qurmet kórsetemiz. Sondaı-aq Reseıde áskerı qaqtyǵysqa qarsy batyl pikir bildirgenderdi qoldaımyz. Olardyń daýysyn estımiz. Bul – óte mańyzdy», dedi Iens Stoltenberg.
Jıyn barysynda Ýkraına prezıdenti Volodımır Zelenskıı beıne-úndeý jarııalady. Onda V.Zelenskıı NATO elderine renishin jetkizip, eldiń áýe keńistigin jaba almaǵanyna narazylyǵyn bildirdi. Sonymen qatar Ýkraına prezıdenti NATO-dan ushaqtar men tankter berýdi surady.
