Osy órege qyz-kelinshekter irkitti qaınatyp, súzip alǵan qurttary men qaınaı-qaınaı sýy sorǵyǵan qyzyl jáne sary sýynan aıyrǵan aq irimshikterin jaıady. Sonan soń jartylaı tobarsyǵan aq tamaqtardy móshekke salyp, aýzyn býyp, óreniń astyna, ıaǵnı kóleńkege keptiredi. Kóleńkede kepken taǵam kógermeıdi ári ys shalmaıdy. Jazdyń shildesinde ystyqtan qashqan ıt-kúshikter óreniń astyn panalap, kóleńkelep jatady.
Ýıkıpedııada: «О́re – qurt-irimshik sııaqty sútten jasalǵan taǵamdardy keptirýge arnalyp, aǵashtan jasalǵan sóre» degen anyqtama berip ári qaraı jasalý tártibin baıandaıdy. «Uzynsha tórt tireýish aǵashty jerge qaqqannan keıin, eki uzyn janaǵashty ashalarǵa kıgizip, olardyń basyna qysqa janaǵashtardy kóldeneń ornalastyryp, jippen nemese qaıyspen biriktirip, ústine toqylǵan shı jabady. Daıyn bolǵan soń betine keptiriletin taǵamdar qoıylady. Sondaı-aq janaǵashtar jetispegen jaǵdaıda bir jaq shetin kıiz úı mańdaıshasyna tirep, ekinshi basyn eki tireýlik aǵashqa bekitip te jasaıdy» depti.
Sol sııaqty 2014 jyly jaryq kórgen «Qazaqtyń etnografııalyq kategorııalar, uǵymdar men ataýlardyń dástúrli júıesi» atty bestomdyq ensıklopedııanyń besinshi tomynyń 49-betinde: «О́re – qurt-irimshik sııaqty aq taǵamdardy keptirýge arnalǵan qural. О́rege jazdyń jańbyrsyz ashyq kúnderi qurt-irimshik jaıyp keptiredi. Ádette, óreni úıdiń aldyndaǵy ashyq alańqaıǵa uzyndyǵy eki qulash, eni bir qulash aýmaqqa tórt dińgekke ornalastyrady. Dińgektiń bastaryn syryq aǵashpen baılanystyryp, arasyna shabaq aǵashtar qoıylady. Ústine óre shı nemese shypta shı dep atalatyn arasy sırek toqylǵan shı tóseledi. Mundaı sırek toqylǵan shıdiń ústine jaıylǵan qurt-irimshiktiń astynan jel keýlep, onyń kógermeı tez degdýine septigi tıedi» dep jazypty. Bulardyń qaı-qaısysy da durys. Tek birin-biri tolyqtyryp tur. Qazaqtyń talpynysy shamaly adamdy «О́resi tar» dep, emese talantty tulǵany «О́resi bıik» dep baǵalaıtyny osy – óre.
Osy óreniń jaýy – kezquıryq degen qus. Bul haıýannyń dene uzyndyǵy 70 sm shamasynda, quıryǵy eki aıyp bolǵandyqtan osylaı atanǵan. Tiri maqulyqtardy (tyshqan, saryshunaq, túıequlaq t.b.) ustap qorektenýge qabileti az. Kóp jaǵdaıda aýyl úıdi tóńirektep, sál qıys qalǵan taǵam kórse ile qashyp jeıdi. Ásirese, óreden qurt urlaýǵa sheber. Marqum aqyn Járken Bódeshuly «Aýyl saǵynyshy» atty jyrynda «О́reden irimshigin ap qashatyn, Saǵyndym kezquıryǵyn, qarǵasyn da...» dep tolǵaıtyny osy.
Onyń syrtynda aýyldyń erikken balalary, apalardyń kózin ala berip, óreden qurt-irimshik urlaıtynyn qaıtersiz. Úlken aqyn Muqaǵalı Maqataev «Neni ańsaımyn» atty jyrynda: «Seni ańsaımyn, qaınaǵan aq bastaýlar, Aq bas taýlar - samaıyn aq basqandar. Seni ańsaımyn, qazirgi aq bas shaldar, Burynǵy óreden qurt ap qashqandar» deıtin shýmaǵy sózimizge dálel.
