Infografıkany jasaǵan Amangeldi Qııas, «EQ»
Bul rette, Qazaqstan halqy Assambleıasynyń depýtattaryna qatysty ózgeristerge toqtalǵandy jón sanap otyrmyn. Memleket basshysy Qazaqstan halqy Assambleıasynyń Májilistegi kvotasyn joıyp, atalǵan kvotany Senatqa aýystyrdy. Buǵan qosa, birneshe ózgeris bolatyny taǵy aıtyldy. Máselen, parlamentarııler quramyn proporsıonaldy jáne majorıtarly tártippen saılaý usynyldy. Sonymen qatar Parlamenttiń joǵarǵy palatasyndaǵy prezıdenttik kvota 15-ten 10 depýtatqa deıin qysqaryp, bul qadam Prezıdenttiń quzyretin shekteıtin sharanyń biri bolmaq. Ol 10 depýtattyń beseýin Assambleıa usynady. Memleket basshysynyń bul sheshimin jurt jyly qabyldaıdy degen senimdemin.
Taǵy bir aıta keterligi, Senattyń quzyreti keńeıip, Konstıtýsııalyq keńes pen Joǵary sot keńesiniń tóraǵasy laýazymyna usynylatyn kandıdattarǵa kelisim berý quqyǵymen tolyqty. Osylaısha, elimizdegi túrli etnostyq toptarǵa mandat berilip, olardyń úni joǵarǵy palatada estilýine laıyqty jaǵdaı, biregeı múmkindik jasalady. О́zderińiz jaqsy biletindeı, Memleket basshysy zańdy túrde Qazaqstan halqy Assambleıasynyń Tóraǵasy. De ıýre de, de fakto da solaı. Sondyqtan Assambleıa usynǵan 5 depýtattyń Senatta qyzmet etýi zańdy.
Sonymen qatar elimizde jańadan 3 oblys qurylady. Bul da asa mańyzdy, qajet sheshim dep aıtar edim. Sebebi bizdiń kóptegen zertteýlerimiz kórsetip otyrǵandaı, ásirese elimizdiń ońtústik óńirinde halyq óte tyǵyz shoǵyrlanǵan. Osy másele jumys ornynyń tapshylyǵyn týyndatyp otyr. Buǵan qosa, Almatyǵa irgeles ornalasqan aýdandar men aýyldardyń azamattary óz ómirin tek osy óńirmen baılanystyrady. Bul jaǵdaı pandemııa kezinde de, Qańtar oqıǵasy kezinde de eń aldymen, halyqtyń júrip turýyna, qımyl-qozǵalysyna keri áserin, kedergisin tıgizdi. Al Semeı men Jezqazǵan óńirinde kerisinshe, ekonomıkalyq jaǵdaıdyń nasharlyǵynan halyq sany azaıa bastady. Turǵyndar sany azaıǵan soń shahardy, aýdandy, aýyldy damytýǵa bıýdjetten de qomaqty qarajat bólinbeıtini belgili. Ondaı jerde óndiris oryndary da qurylmaıdy, saýda-sattyq da damymaıdy.
Endigi rette, jańadan qurylatyn oblystardyń ınfraqurylymy damyp, joly jóndeletini, ózge oblystarmen baılanysy nyǵaıatyny anyq. Sondyqtan Memleket basshysynyń bul qadamy kóptegen túıtkildi máseleniń túıinin tarqatýǵa sep bolyp, basqarý júıesine qolaıly jaǵdaı jasalady dep senemin.
Aıgúl SÁDÝAQASOVA,
áleýmettanýshy
