Is-shara barysynda spıkerler tabysqa jetý jáne jeke ósý daǵdylaryn damytý boıynsha paıdaly keńesterimen bólisti. Qatysýshylar ózderin qyzyqtyrǵan suraqtaryn qoıyp, aýyldyq deńgeıde jastar saıasatyn jetildirýdiń ózekti taqyryptaryn talqylady.
Sonymen qatar «Assambleıa jastary» uıymynyń kóshbasshylary «Taza orta» jobalyq baǵyty aıasynda ekologııalyq aksııa ótkizdi. Uıǵyr aýdanynyń ortalyǵynda jergilikti jastarmen birlesip, «Dostyq alleıasyna» aǵash otyrǵyzdy. Bul kúni belsendiler 50 qylqan japyraqty aǵash kóshetin ekti. Olar keleshekte aýdannyń kóz tartar kórikti jerine aınalary sózsiz.
«Buǵan deıin Memleket basshysy 2 mlrd aǵash otyrǵyzý týraly bastama kótergen. Bizder – jastar óz kúshimizben elimizdi kógaldandyrýǵa kómektesýge tyrysamyz. Biz Uıǵyr aýdanyndaǵy Dostyq alleıasyn túrli etnos ókilderiniń: qazaq, uıǵyr, tatar, orys jáne t.b. kúshimen ornattyq. Al osyndaı birlesken jasampazdyq is-sharalar jastarymyzdyń birigýine yqpal etedi jáne bul alleıa aýdan turǵyndary úshin jaqsy syılyq bolady dep úmittenemiz», dedi «Assambleıa jastary» RQB tóraǵasy Tımýr Jumyrbaev.
Is-sharaǵa qatysýshylar osyndaı jastar bastamalaryn iske asyrý basqa óńirlerde de jalǵasatynyn atap ótti. Esterińizge sala keteıik, ekologııany saqtaý jáne qorshaǵan ortany qorǵaý – «Assambleıa jastary» uıymy qyzmetiniń mańyzdy baǵyttarynyń biri. Sondaı-aq uıym belsendileriniń josparynda basqa óńirlerde «Halyq dostyǵy» saıabaqtaryna aǵash otyrǵyzý da bar. Bul bastamany byltyr qazan aıynda QHA keńesiniń keńeıtilgen otyrysynda Memleket basshysy usynǵan.
Almaty oblysynda ótken is-sharalarǵa «Assambleıa jastary» RQB tóraǵasy T.Jumyrbaev, ASAR-UME qorynyń negizin qalaýshy jáne Prezıdent janyndaǵy jastar saıasaty jónindegi Keńestiń múshesi A.Nurmashev, Qazaqstan uıǵyr jastary odaǵynyń tóraǵasy R.Qaıryev, «Assambleıa jastary» RQB Almaty oblysyndaǵy ókildiginiń tóraǵasy R.Ýsanova jáne jastar uıymdarynyń ókilderi, eriktiler men jergilikti turǵyndar qatysty.
