Memleket basshysynyń Ulttyq qoǵamdyq senim keńesiniń VI otyrysynda bergen tapsyrmasyn oryndaý sheńberinde Eńbek jáne halyqty áleýmettik qorǵaý mınıstrligi azamattardy jumysqa ornalastyrý kezinde qaǵaz qujattamany paıdalanýdy barynsha azaıtý, sondaı-aq sıfrly kadrlyq qujattamany damytý boıynsha jumys júrgizýde.
Qoıylǵan mindetterdi oryndaý boıynsha negizgi quraldardyń biri – E-HR júıesi. Ol 2018 jyldan bastap jumys isteıdi jáne jumys berýshilerge óziniń kadr júıesi nemese Elektrondyq eńbek bırjasy arqyly óz qyzmetkerlerimen sharttardy tirkeýge múmkindik beredi.
Sonymen qatar E-HR júıesi qyzmetkerlerdiń elektrondy jeke isterin avtomatty túrde qalyptastyrady jáne azamattyń kelisimi boıynsha áleýetti jumys berýshige aqparat beredi.
«Aǵymdaǵy jyly bizdiń aldymyzda E-HR júıesinde eńbek sharttarynyń keminde 90%-yn tirkeý mindeti tur. Bolashaqta, 2023 jyly barlyq jumys isteıtin halyqty qamtýdy josparlap otyrmyz», dedi Eńbek jáne halyqty áleýmettik qorǵaý vıse-mınıstri Erbol Ospanov.
E-HR júıesimen óńdeletin aqparat salalar bólinisinde jaldamaly qyzmetkerlerdiń sanyn monıtorıngileý, jumys berýshilerdiń óz qyzmetkerleriniń paıdasyna salyq tólemderi men áleýmettik aýdarymdardy júzege asyrýy úshin paıdalanylady. Osylaısha, eńbek qatynastary ashyq bola bastaıdy, bul jumysshylardyń eńbek quqyqtaryn qorǵaýǵa yqpal etedi.
