Balalar ınternet-marketıng, oıyn dızaıny, python ázirleý, veb-dızaın, veb-ázirleý, mobıldi ázirleý, dybystyq dızaın, áleýmettik medıany basqarý, sıfrly kommýnıkasııa jáne beıne jasaý sııaqty salalar boıynsha 10 onlaın kýrsqa qol jetkizdi. Arnaıy ázirlengen ınteraktıvti platformada kásiptik baǵdar berý testileri, beıne sabaqtary bar bloktar, trenıngter jáne praktıkalyq tapsyrmalar ornalastyrylǵan.
«Bul jobaǵa mektebimizden 20 oqýshy qatysyp jatyr. Digital Maman bolashaqtyń mamandyqtaryn úıretetindikten, balalar qyzyǵýshylyq tanytyp, belsendi qatysyp júr. Bul baǵdarlamadan úlken úmit kútilýde, bolashaq stýdentterge mamandyq tańdaýda kómektesedi dep oılaımyn. Árıne, balalar úshin bári jańalyq, olar mundaı mamandyqtar týraly estip qana qoıǵan, endi tereńirek úńilip oqyp, is júzinde jobalar jasaı bastady», deıdi №78 mektep-gımnazııasynyń dırektory Raýshan Qojambetova.
Jobany uıymdastyrýshylardyń aıtýynsha, dúnıe júzinde sıfrly mamandyqtardy meńgerýge daıyn stýdentter sany jyl saıyn artyp keledi. Qazaqstanda sıfrly mádenıettiń damýy, sıfrly quzyretterin damytatyn jáne jańa startaptar men jobalardy qurýǵa qushtar, jas jigitter men qyzdardy biriktiretin qaýymdastyqtar qurý qajet.
«Digital Maman – joǵary synyp oqýshylaryna 21 ǵasyrǵa saı daǵdylardy úıretýge baǵyttalǵan Qazaqstandaǵy alǵashqy baǵdarlama. Veb-ázirleýdi úırete otyryp, baǵdarlamalaýdy mektepte meńgergen oqýshylar básekege qabiletti bolyp, ýnıversıtet baǵdarlamasyna daıyn bolady dep oılaımyn», dep bólisti frontend ázirleýshisi jáne Element baǵdarlamalaý mektebiniń muǵalimi Aıanbek Shynar.
«2021 jyldyń qarashasynda Digital Maman baǵdarlamasy boıynsha, Almatydaǵy 50 mektepte oqýdy bastaǵan 1 myń oqýshy jetekshi sarapshylardan sıfrly bilim men daǵdylar aldy. 6 myń oqýshynyń óz betimen bilim alýyna múmkindik berildi. Demo kúni mektep oqýshylarynyń nátıjelerimen kórneki túrde tanysýǵa múmkindik beredi jáne oqýshylarǵa sıfrly quzyrettilikterdi úıretýden basqa, óz jobalaryn úlken aýdıtorııaǵa usyný arqyly soft skills damytýǵa, sıfrly tehnologııalarǵa qumar adamdardy, jańa dostar tabýǵa kómektesedi», deıdi jobany uıymdastyrýshylar.
