Kórkem kartına kóńilden shyqsa, oıyńyzda shyr kóbelek aınalyp júrip alady. Sýretshi Ivan Fomıchtiń «Makınka qysy» shyǵarmasy sanada ótken qystyń esteligin jańǵyrtqandaı boldy. Ýaqyt urshyǵy qansha dóńgelese de ár mezgilde bir saǵynysh qalady. Qylqalam sheberi balalyq shaǵynyń baıandy sátinen bir úzik syr tarqatqandaı. Bul týyndyda da bir qasiret bar.
Kenepten árkim ártúrli tús kóredi. Bul qystyń da qysqa bolǵany daýsyz. Uzaqqa sozylǵandaı kóringenimen kóktem kelgen soń kórgen tústeı ǵana bolyp qaldy. О́ner ıesiniń ótken ómiriniń bir órnegindeı máńgi baıanyna aınalary anyq. Kıiz úı tektes pishinde berilgen úı shatyrlary ótken ǵasyrdyń keskin-kelbetin kóz aldyńyzǵa ákeledi.
Shynynda, sýretshi «Makınka qysy» kartınasynda tyń ıgerýge kelgen eriktiler men entýzıastardyń aldynan shyqqan turmys qıyndyqtary men qatal tabıǵatty berýge tyrysqan. Biz kartınadan qar basqan túngi aýyldyń jaı-kúıin kóremiz. Ol Makınkany kenep betine qarańǵy aspan, alasa úıler, murjadan býdaqtaǵan tútin arqyly beınelegen. Japalaqtap jaýǵan qar úlpildep, aınalanyń bárin aq mamyqpen jaýyp tastaǵan. Baqsańyz, kartına sýyqqa shomylǵandaı, yzǵyryq atyp turǵan tabıǵattyń kórinisin syılaıdy.
Ivan Fomıch salqyn, tynyq tústerdi qoldana otyryp, typ-tynysh ári jaıly kishkentaı aýyldyń birqalypty tirshiligin jetkizgen. Eńbek adamdary qaqaǵan aıazdy da jeńip shyǵýǵa qaýqarly ekenin baıandaıdy. Turmys taýqymetin tartqan pende ıesi azapty sýyqty da, qandy soǵysty da, qaraorman qaıǵyny da eńserer kúshke ıe. Molberttegi boıaýmen jazylǵan maqalanyń máni osy.
