Qarýly Kúshter óz mindetin oryndaýǵa árdaıym daıyn bolýǵa tıis

Memleket basshysy Nursultan Nazarbaev Qorǵanys mınıstrliginiń basshylyq quramymen kezdesti, dep habarlady Prezıdenttiń baspasóz qyzmeti. Memleket basshysy kezdesý barysynda Serik Ahmetovtiń Qorǵanys mınıstri laýazymyna taǵaıyndalǵany týraly habarlaı kelip, onyń basshylyq jumysta mol tájirıbesi bar ekenin aıtty. – Búgingi kúni ol bul qyzmetke eń laıyqty adam dep sanaımyn. Biz Qorǵanys mınıstri etip azamattyq tulǵany taǵaıyndaý baǵytyn ustanyp kelemiz. Bizge qorǵanys kesheni kásiporyndaryn damytýdy, armııamyzdy zamanaýı tehnıkamen jabdyqtaýdy jalǵastyrý, sondaı-aq, memleket qarajatyn tıimdi paıdalanýdy qamtamasyz etý qajet, – dedi Nursultan Nazarbaev. Qazaqstan Prezıdenti jaqynda ótken jedel-strategııalyq keńes kezinde alǵa qoıylǵan mindetterdi iske asyrýdyń mańyzdylyǵyn atap ótti. Sońynda Memleket basshysy elimizdiń Qarýly Kúshteri áskerı mindetterin oryndaýǵa árdaıym daıyn bolýǵa jáne óz kásibı sheberlikterin udaıy jetildirip otyrýǵa tıis ekenine toqtaldy. ----------------------------------------- Sýretterdi túsirgender S.BONDARENKO, B.OTARBAEV.