Assambleıa Tóraǵasynyń orynbasary – Hatshylyq meńgerýshisi Marat Ázilhanov Analar keńesiniń jumysy týraly aıta kele, halyqtyń túrli toptaryn maqsatty qamtý úshin analardyń áleýetin arttyrýdyń mańyzdylyǵyna nazar aýdardy.
– Assambleıanyń Analar keńesteri saıası reformalar strategııasyn iske asyrýǵa, eldegi beıbitshilik pen kelisimdi nyǵaıtýǵa, azamattyq qoǵammen baılanys ornatýda eńbek etedi. Analar keńesi balalardyń quqyqtaryn qorǵaý, sýısıdke jol bermeý, qoǵamdaǵy zorlyq-zombylyqty azaıtý, otbasylyq-turmystyq qatynastar salasyndaǵy quqyq buzýshylyqtardyń aldyn alý boıynsha jumystarǵa belsendi aralasýy kerek. Biz resmı túrde «Mádenıetti ana – mádenıetti ult» jobasyn iske asyrýdy bastaımyz. Joba ajyrasý, sýısıdtiń aldyn alý, salamatty ómir saltyn dáripteý, bilim men eńbeksúıgishtikke baýlý boıynsha memlekettik organdarmen, azamattyq qoǵam ınstıtýttarymen birlese jumys isteıdi, – dedi M.Ázilhanov.
Jańa jobany tolyǵyraq tanystyrǵan Qazaqstan halqy Assambleıasy respýblıkalyq Analar keńesiniń tóraıymy Nazıpa Shanaı ár baǵytqa jeke toqtalyp, ortalyq pen jergilikti jerlerde ótetin is-sharalardy baıandady.
Otyrys barysynda Assambleıanyń óńirlik Analar keńesiniń jetekshileri sóz sóılep, etnomádenı birlestikterdiń qoldaýymen óńirlerde júrgizilip jatqan jumystarǵa toqtaldy.
